uMthunywa
IMIDENI yezisebenzi ezimbili zikaManisipala uMsunduzi, abathanqazeke phansi batshona bekhanda izigxobo zikagetsi, ikhala ngezingane ezingu-16 abazitshiyileyo kulandela isehlakalo sangeSonto ntambama eMgungundlovu kweleSouth Africa.
UMnumzana Mdunyiswa Vivian Shozi (46) weMaqongqo utshiye izingane zakhe ezingu-11, kwathi uMnu Thembinkosi Gerald Sithole (63) waKwaDambuza watshiya izingane ezinhlanu.
UShozi ubeleminyaka engu-21 esebenza kumasipala kukanti uSithole ubeleminyaka engu-38 kusukela aqatshwa.
Lezi zisebenzi bezibizwe ukuyalungisa amagetsi kuCollege Road, e-Alexandra Park, eScottsville.
Kuvele ukuthi bebekhwele phezulu ngomtshina obizwa ngokuthi yi-bucket truck ngesikhathi kuqamuka okuthize bahle bawela phansi.
Umfakazi obekhona lokhu kusenzakala uthe batshaye phansi ngesiphundu balimala kakhulu.
Kuthiwa beziyisikhombisa izisebenzi ebezibiziwe ukuzolungisa amagetsi ngehola lika-5 ntambama.
Laba ababili yibo abakhwele kule ikheji ukuze balungise umonakalo. Okhulumela abezimo eziphuthumayo abe Netcare 911 uChris Botha uthe bafike abasebenzi sebelele phansi belimele kanzima.
“Laba basebenzi bawile besuka phezu kwesigxobo samagetsi. Sizamile ukubelapha endaweni yesehlakalo kodwa bebelimele kakhulu. Bagijinyiselwe esibhedlela kodwa bafike batshona,” kutsho uBotha. Izolo kuthintwa imideni yalezi zisebenzi kuvele ukuthi bebehlezi besitsho ukuthi basebenzela izingane zabo.
Indodana kaSithole, uMnumzana Nhlanhla Sithole, uthe uyise ubengathandi ukuthatha umhlalaphansi yize iminyaka ibisivuma.
“Ubaba ubewuthanda kakhulu umndeni wakhe nomsebenzi wakhe. Besihlala ngokumtshela ukuthi athathe impentsheni ngoba uleminyaka engaphezu kuka-60.
Ubekhala ngokuthi ingane yakhe eneminyaka engu-11 isafunda ngakho ngeke akwazi ukuyekela umsebenzi ingakaqedi ukufunda,” kutsho uSithole.
UMnu Richard Shozi, ongumfowabo kaMdunyiswa, uthe basaphithene amakhanda ngesehlakalo lesi njengoba kusele izingane ezinengi kangaka.
Okhulumela uManisipala weMsunduzi uNkosikazi Nqobile Madonda uthe badumele ngokudlula kwabasebenzi babo emhlabeni ngokuzuma.
“Umnyaka siwuqala kubi ngokutshonelwa yizisebenzi zethu ezimbili besemsebenzini. USithole loShozi kade belungisa amagetsi ngesikhathi besiwa phansi. Kukhanya kukhona okuqamukileyo okubangele ukuthi bawe.
Uphenyo olugcweleyo ngengozi le luyaqhubeka. Sedlulisa amazwi enduduzo kuzisebenzi lomdeni wabathintekayo,” kutsho uNkkz Madonda. Imingcwabo ibisahlelwa. — Ubulembu
