uMthunywa
Cornelius Luphahla
SEKUVELE ukuthi kulabantu abanengi abafa begwazwa abanye begongodwa yizigebengu kwenye ikilabhu eselokitshini leMakhandeni edolobheni lakoBulawayo osokubangele ukuthi izakhamizi zithi indawo le ivalwe, uMthunywa uyakuveza lokhu.
Kubikwa abantu balinyazwa maviki onke ntambama e-Cricket Club osekubangele ukuba izakhamizi lazo zihlalele evalweni nanko phela akusindlamanzi zodwa ezisengozini kodwa lezakhamizi eziquma kule indawo.
Kubikwa ezinye izakhamizi sezizame ukukhulumisana labanikazi bekilabhu le ukuthi ivalwe kodwa sekwehlule.
Esinye isakhamuzi esihlala kulelilokitshi esithande ukwaziwa ngokuthi nguJoel nje kuphela sithe sokulabantu abanengi ababulawa bephuma ebhawa le.
“Sokulabantu abanengi sibili abafa begwazwa bephuma ebhawa le ebusuku osokudala ukuthi sibone kungcono ukuthi ivalwe ngoba siqede abantu noma nje umnikazi wayo esala.
“Isimanga yikuthi noma kunjalo abantu baqhubekela phambili betheleka kule ibhawa besiyanatha khona asazi ukuthi kulani okubabizayo,” kutsho uJoel.
UNkosazana Sakhile Moyo oyisakhamuzi kulelilokitshi ubikele intatheli ukuthi sebesesaba ukwehlela kule indawo ebusuku ngenxa yezigelekeqe ezilapha.
“Sesisesaba lokuhamba ebusuku lapha ngoba sokulamasela abamba abantu nxa besehla emtshoveni khonapha ebhawa le. Kwesinye isikhathi bengakubamba bayakugwaza bakulimaze kumbe bakutshaye bakuthathele impahla zonke ozithweleyo.
“Ngikhuluma nje kuviki ephelileyo kulesinye isakhamuzi salapha esithathelwe imali lempahla ngamasela sivela emsebenzini,” kulandisa uNkszn Moyo.
Omunye wezisebenzi zakule ibhawa ongathandanga ukubethwa ngegama ubikele intatheli ukuthi kuliqiniso ukuba sebebanengi abantu abafa besuka ebhawa le njalo kudingeka amapholisa angasebenzela kule indawo ebusuku.
“Kuliqiniso sibili ukuthi abantu bayaphela ngokugwazana ebhawa le. Ngikhuluma nje emavikini amabili adluleyo kulomunye ogwazwe wafa esuka khonapha bamthathela konke ayekuthwele.
“Izigangi lezi ziyakwekela usuke ebhawa le besezikulandela ziyekubulalela phambili ngoba sezinanzelele ukuthi lapha zingabonakala. Lapha sokudingeka amapholisa azakhankasa indawo yonke le ntambama abophe izigangi lezi ngoba seziqede abantu,” kuveza Isisebenzi lesi.
Kuzwakale ukuthi umnikazi wale ibhawa kabonakali emini noma nje izakhamizi zalapha zihlala zimdinga ukuze zikhulumisane laye ngohlupho osoludalwa yibhawa yakhe le.
UKhansila wakule indawo uMnumzana Pilate Moyo ebuzwa ngale indaba uveze ukuthi kakwazi ukuthi ibhawa le seyavulwa wayicina ivaliwe njalo kuyamdanisa lokhu.
“Bengingakezwa ukuthi ibhawa le seyavulwa ngacina ivaliwe ngingakabi nguKhansila. Okungimangalisayo yikuthi umnikazi webhawa le wangena njani kiyo engazange angibikele. Ngakho-ke ngizahlolisisa ukuze ngikhulumisane lamapholisa asincedise ngokubopha izigebengu lezi,” kutsho uKhansila uMoyo.
Isikhulumeli sedolobho lakoBulawayo uInspector Precious Simango ebuzwa ngale indaba uchaze ukuthi bebengakayizwa lindaba njalo bazadingisisa.
“Indaba yokubulawa kwabantu ebhawa yeCricket Club besingakayizwa ngakho sizayihlolisisa ukuze sibone indlela esingavikela ngayo ukufa kwabantu,” kuphetha uInspector Simango.
