uMthunywa
ISADIDEKILE imideni yabangane ababulewe besiyahlahlula esangomeni eMsinga.
Abangane abathathu, uThokozani Mdlalose, Thuthukani Langa loMabutho Ntuli badutshulwe ngoyaba lwezinhlamvu besemoteni abebehamba ngayo iToyota Etios, ngoLwesihlanu ebusuku.
Laba kuthiwa bebesendleleni eya esangomeni esikule indawo, besuka emakhaya abo eMatimatolo.
Kuthiwa badubuleke kakhulu emzimbeni lasekhanda, njengoba ubuchopho bebubonwa ngamehlo ngabantu abebezidlulela endaweni yesehlakalo.
Okhulumela amapholisa eKwaZulu-Natal, uLt Colonel Thulani Zwane, uthe kuvulwe amacala amathathu okubulala esiteshini seMsinga.
“Ayaziwa imbangela yokubulawa kwabantu abathathu abadutshulwe besemoteni endaweni yeMabaso eMsinga ngoLwesihlanu. Uphenyo lwamapholisa luyaqhubeka,” kutsho uZwane.
Uyise kaMdlalose, uMnumzana Lisa Mdlalose, ekhuluma leSolezwe izolo uthe kayazi imota ebitshayelwa ngumntanakhe kodwa ngokuthola kwakhe kuthiwa babesiya esangomeni bephelekezele umngane wabo.
“Thina singumdeni asazi ukuthi kungani ebulewe ngoba sithintwe sebedutshuliwe. Asazi bekwenzenjani.
Sizwe kuthiwa bebelandelwa yimota, kwaphuma abantu ababili kuyo bephethe izibhamu ezinkulu base bebadubula.
Ohlangane labo eGreytown besaya khona eMsinga, bamtshele ukuthi baya komunye umama ohlolayo eMsinga.
Umngane wakhe ebekuzokuba lomsebenzi kubo, kuthiwa nguye obefuna ukuyohlola esangomeni,” kutsho uMdlalose.
Okhulumela umdeni wakoLanga, uMnumzana Sondelani Langa, ukuqinisekisile ukuthi ngempela laba abatshonileyo bebesiya esangomeni.
“Sisatshaqekile nje ukuthi babulewe. Asazi lokuthi kungani behlaselwe. Esikwaziyo yikuthi bebesiya esangomeni ngesikhathi bedutshulwa,” kutsho uLanga.
Ebuzwa ngokuthi ngabe bekuzoba lomsebenzi yini emdenini, uvumile.
“Komalume kaThuthukani, kuzoba lomsebenzi ngoNhlangula lonyaka,” kutsho uLanga.
Laba bangani kuthiwa bebengamathe lolimi njengoba bebejwayele ukuhamba ndawonye.
Uyise kaMdlalose uthe indodana yakhe ibingasebenzi futhi ingafundi. Uthe wamtshela ukuthi ule-car wash belomngane wakhe.
ULanga laye kuthiwa ubengafundi futhi engasebenzi, ezihlalela ekhaya.
Imizamo yokuxhumana lomdeni kaNtuli laye otshone kulesi sigameko, ayizange iphumelele. — Ubulembu
