uMthunywa
Nkosilodumo Ndebele
LOBA nje bethi uNkulunkulu usithanda sonke, iqembu lenguqu elidlala kuligi yezokholo iFlying Stars kukhanya selithole isihawu kulamaqembu onke ngemva kokwedlula iSpirit Filled Ministries ngamaphuzu.
IFlying Stars isisemqongweni weligi ngamaphuzu ngemva kokunqoba iqembu leEagle Life 3-0 ngempelaviki edluleyo.
Umdlalo wenkosi zayizolo kuligi, iSpirit Filled Ministries kawuzange udlalwe ngoba iqembu leBrethren-in-Christ Church (BICC) kalenelisanga ukuza lamaphepha aneleyo abadlali benguqu.
Umdlalo wakhona suzadlalwa ngeviki ezalandela yonale ngenxa yokhetho oluzakubakhona ngoMvulo ozayo.
Umkhokheli weFlying Stars uEvans Madhuku uthe ujabule kakhulu ngokuthi iqembu lakhe selindiza emoyeni kuligi.
“Abadlali bami ngabazisa ekuqaleni komnyaka ukuthi sihlose ukunqoba sithathe inkezo sihambe layo ekhaya.”
“Senza njalo isivumelwano sokuthi ekupheleni kwengxenye yokuqala yesizini kumele sibe sesisemqongweni weligi ngamaphuzu njalo lokhu kwenzakele kungakho ngibatshayela ihlombe,” kuqhubeka uMadhuku.
Uthe khathesi njengeqembu kabasaphindi bekhangele emuva.
“Asifuni kukhangela muva, lasebhukwini elingcwele umkaLothi waphenduka waba lisawudo, ngokukhangela emuva kungakho lokhu kusipha intshukuntshu ukuthi siqhubekele phambili ngokunqoba kwethu mhlawumbe sicine siphenduke isawudo,” kutsho uMadhuku.
ISpirit Filled Ministries ithe ngemva kokhetho lukamongameli, izimisele ukuthi ithathe isihlalo sayo phezulu kuligi.
“Silethemba lokuthi iFlying Stars ayisoze ihlale ikhudumale esihlalweni sethu ngoba siyaphenduka ukuzosithatha.”
“Thina siliqembu elitsha kodwa ngilethemba lokuthi sebenanzelele ukuthi asilandanga ukwengeza amanani kuligi kodwa silande ukunqoba. Sizasithatha isihlalo sethu,” kutsho umkhokheli uEvans Madhuku.
Kweminye imidlalo, iVictory Fellowship ibhabhathize iAssemblies United 2-0.
Abathwali benkezo ngonyaka odluleyo, iSangano Legends inqobe iMpopoma Nazarene 5-3 kukanti iGCC yona yenelise ukunqoba iZCC 4-1.
Iqembu leSt Patrick’s lona leneliswe ukunqotshwa yi HOPG 3-1.
