uMthunywa
Silo C Dube kugwalo
Lulotshwe nguP Ndebele Siqhubeka ngodaba lukaSwabide Khumalo, umphathisikolo wesikolo seTotololo. Yindoda efundileyo uKhumalo, kodwa ikhanya ikholwa lakuzinto zesiNtu. Umntwana okhubazekileyo ozelwe emzini wakhe, ngowomkakhe uMaNdlovu yedwa, hatshi laye. Lokhu ukuveza sobala nxa etshela umsekeli wakhe uVundla. Uthi, “Wazalwa enjalo lalowo mntwana kaMaNdlovu engikhuluma ngaye Vundla.”
Njengokutsho kwami ngeviki ephelileyo lokhu kutshengisa ukuthi luyaphila ugwalo lukaNdebele lolu ngoba luveza xathu izinto ezenzakala khathesi. Kukanengi sisizwa, sikubala kumaphephandaba obaba abanengi bebaleka emizini yabo ngoba sekuzelwe umntwana oyisilima lapho ekhaya. Omama yibo abetheswa umlandu wokuletha abantwana abanjalo. Abanye njengalokhu esikubona ngoKhumalo bakholwa ukuthi abantwana abanjalo babangelwa yibuthakathi.
UKhumalo ukholwa ukuthi sekuzelwe isilima emzini wakhe nje kungenxa yabathakathi abamzondayo kungakho ulala engalele edinga izinyanga. Siyambona ekuqaleni lanxa enze isinqumo esibukekayo ukuthi usane lolu lanxa lugogekile lwaluzaphila ephikisana lombono wezalukazi uMaKhuphe loMaNsingo wokuthi lolosane lwedluliswe kazange amthakazelele lowo mntwana. Nango egijima esiyakunyanga uMahaqaza esiyadinga umuthi wokuthi amdlulise lowo mntwana.
Ngenhlanhla yomntwana okwaba ngumnyama wakhe uKhumalo imithi kaMahaqaza kayisasebenzanga njengokufisa kwakhe. Umntwana, uNkosi, kasafanga. Kungasela qhinga ayengalenza uKhumalo kwasekumele amamukele umntwana, amthande lanxa wayengafuni. Wenza konke okutshengisa ukuthi usemthanda umntwana, uyamphatha, uyamanga, usebuyele wayakwejisa lemuli yakhe emkulwini. Nxa sibona esesenzenje uKhumalo sithi usemukele ngokuphelelyo umntwana.
Sihlangana laye esengosuka emzini wakhe eqamba amanga athi kukhona ayakulungisa esikolo kanti ebalekela sona isilima sikaMaNdlovu lesi. UMaNdlovu kakuzwisisi lokhu kusuka kukaKhumalo ngekhaya esiyahlala esikolo. Lokhu kwenza uKhumalo ahwatshe amanga esabekayo esizwa eselandiswa nguMaNdlovu etshela umnawakhe uNothando, ongumlamu kaKhumalo. Uthi uMaNdlovu ngokuzwa kwakhe: “Zazingasamanga kuhle izinto esikolo sakhe. Kuthiwa amatitsha amancane la ayesephendule isikolo asenza iSodoma leGomora, sekukompunzi idla emini.
“Openteka basebedlalela emagumeni esikolo ngokungenziyo okwasekusolisa lezakhamizi. Wakubona kungcono-ke ubaba ukuthi akayekwethusa lobobudli, bafunde ukudlalela khatshana lomuzi wakhe.” Kwakungamanga aluhlaza la ayekhulunywe nguKhumalo. Asikukhohlwa njalo ukuthi ekuqaleni wayethe ukungaziphathi kwamatitshala amancane kwakungamenza alahlekelwe ngumsebenzi. Lokhu yikho okwathulisa uMaNdlovu lanxa wayelensolo ukuthi wayesukelani ngekhaya uKhumalo.
Omunye wababalisi uNkomo wayekubonile ngaphambili lokhu ukuthi uKhumalo wayesuswa zinhlupho zomuzi wakhe yikho nje wayesebangele ukuthi basuswe endlini ababehlala kuyo. Kulethemba elikhulu ukuthi uNkosiphile uzafunda engakhula ngoba uVundla uyakuthinta kuKhumalo, lanxa uKhumalo emhleka usulu eyitshaya indiva indaba leyo. UVundla umtshela ngezikolo zeZimcare azizwayo besemhlanganweni wababalisi iZimta.
UNothando, umlamu kaKhumalo, uthi esebonile ukuthi uNkosi ukhubazekile uhle anike udadewabo ithemba lokuthi zikhona izikolo ezifundisa abantwana abanjalo. Ulolwazi olugcweleyo ngalezo zikolo uNothando okwenza udadewabo acine emlalela.
Abantu abalabantwana abakhubazekileyo kuyabathinta ukuzwa angani umuntu ukhangelela abantwana abanjalo phansi. Walahla umlomo engananzelele uNothando lapho athi wayesithi uNkosi ngokwemzini. Wathukuthela uMaNdlovu ebuza umnawakhe ukuthi umsolani umntanakhe aze ambize ngelika lokhu? Wayengananzelelanga uNothando ukuthi uNkosi lowo wayekhubazekile.
