uMthunywa
Silo C Dube kugwalo
USwabide Khumalo uyalibhoboza ithumba kumsekeli wakhe uVundla. Uyalandisa ngento ekhathaza umoya wakhe.
Le yindaba yokuzalwa komntwana ogogekileyo, uNkosiphile, emzini wakhe. Lokhu yimisebenzi yabathakathi ngokubona kukaKhumalo. UVundla kazwisisi ukuthi wazalwa enjani lowo mntwana osekhathaze umoya kaKhumalo.
UKhumalo uyamchazela ethi njengoba esitsho yisilima. Uthi ezalwa lowo mntwana kwakungaqedakali nje ukuthi yinyamazana bani. Okwamanje uthi usuphosa ubone ukuthi ngumuntu loba nje kuzikhanyela ukuthi akuphelelanga.
Kusobala kunkulumo ezinje ukuthi lanxa uKhumalo kungathi usememukele umntwana lo kodwa kamemukelanga ngenhliziyo loba ngomoya wakhe wonke. Ungeze wakhuluma ngomntwana sanyamazana uthi, “Kuzalwa . . .”. Umuntu kuthiwa , “Ezalwa . . .”.
UVundla ubuza umdala wakhe uKhumalo ukuthi pho, umntwana lowo akafani lalaba okuthiwa ngamaZimcare abanye njalo bebabiza ukuthi ngamaSaskamu? UVundla laye utshengisa ukubandlululwa kwabantwana abazalwa bekhubazekile ngoba kasimabizo alungileyo ukuthi babizwe ngawo labo bantwana. UKhumalo nxa embuza ukuthi ngabanjani labo bantwana? UVundla uthi uzwa kuthiwa yilabo abathi bezalwa kube khona okuthile okusuka kuphambaniseke okwenza umntwana akhule elengqondo ezingaphelelanga.
Esikhathini bathi engazalwa elekhanda elingani likhudlwana lamehlo amancinyazana angani atshone phakathi kokhakhayi. Uyaqhubeka uVundla ethi abanye njalo kuthiwa bazalwa umzimba wonke uphongulenga sarabha. Lanxa kuliqiniso leli kodwa yindaba ebuhlungu le ekhulunywa nguVundla loKhumalo njalo kudingeka ukuthi abantu abalengqondo ezinje bafundiswe ukuthi baluphathe njani udaba olunje ukuze abantu abanjalo bengezwa behlukuluzeka nxa kuphathwa udaba lwabo.
Kamemukelanga uNkosi uKhumalo ngoba uthi wazalwa enjalo lalowo mntwana kaMaNdlovu akhuluma ngaye.
Katsho ukuthi uNkosi umntanakhe loMaNdlovu kodwa usengokaMaNdlovu yedwa. Kuvamile kumpilo esiyiphila khathesi ukuthi sizwe omama belandisa ngohlupho ababa lalo nxa sekuzelwe umntwana okhubazekileyo ekhaya.
Izibanga ezinengi sizwa kuthiwa ubaba womntwana wahle wabaleka sekuzelwe umntwana onjalo wamtshiya lonina.
Lokhu kukhathaza amalungelo abomama.
Nxa uKhumalo ebuza uVundla ukuthi zithi bubangelwa yini lobo bulima lezo zazi, uVundla, uphumela egcekeni ethi kazange ebuze ngembangela yakhona. Kodwa uthi kuthiwa banengi abantwana abazalwa benjalo. Emadolobheni sezikhona lezikolo abafunda kuzo ezeZimcare Trust, yikho nje abantu besithi labobantwana ngamaZimcare. Yinto engalunganga leyo. Njengabantu abanengi, uKhumalo uyakulandula lokho okutshiwo nguVundla ethi ngamanga aphindiweyo lawo. Uthi uVundla ukhuluma ngelikabathi, kazake ambone ngawakhe lowo mntwana okukhulunywa ngaye.
Uqhubekela phambili ethi akulazakufunda angakwenza umntwana onjalo. Uthi, “Manga! Angafunda athini umuntu yena waloywa esesiswini sikanina? Inkomo ingamzala umuntu koMhlahlandlela!” Lokhu yikho okwenzakalayo lakhathesi ukwala ukuthi abantwana abazalwa bekhubazekile bayefunda ezikolo. Abazali abanengi babantwana abanjalo bakholwa ukuthi baloywa, akulanto abangayenza ngalokho kanti ngolwazi lwakhathesi bayafunda baphumelele abantwana abakhubazekileyo, badinga ukuzwisiseka lokuncediswa.
