uMthunywa
Silo C Dube kugwalo
USWABIDE Khumalo uzimisele ukuyabulala umntanakhe uNkosi ngoba inyanga uMahaqaza ikwalile ukuthi kube yiyo eyenza lokho. UMahaqaza uthi yena kalifuni igazi lengane emsulwa ezandleni zakhe. Inyanga le itshela uKhumalo ukuthi nxa elunywa yimali kahambe ayeyiphosela kuZambezi. Lapha ngiphose ngathi nansi inyanga kuzwa eyelaphayo njalo engafuni ukuchitha igazi lomuntu ongonanga.
Insolo engilayo ngalinyanga uMahaqaza lanxa besengiphose ngayisekela yikuthi layo kukhanya iyayithanda imali ngoba kwakumele nxa isala ukumbulalela umntwana uNkosi, yona ngokwayo, kwakumele ihle yale lokumenzela umuthi wokubulala lowo imxotshe ahambe uKhumalo. Aluba kwakungasinyanga mthakathi, uMahaqaza, kwakumele axwayise uKhumalo, ngalokho ayefuna ukuyakwenza. Kwakumele ambonise ububi bonke bokwenza lokho.
Inyanga, uMahaqaza, iyathakatha layo ngoba inika uKhumalo, umuthi wokuyachitha umphefumulo. Akesizwe amazwi enyanga uMahaqaza, “Thatha, nansi imikhonto lemitshoko okhala ngayo. Uzakuthi ungafika ekhaya ufake amanzi ebhavini ubusuncweba kancane kulo umuthi osepulastikini uwufake phakathi kwamanzi ugoqozele. Umuzi wonke uzageza ngalowomuthi ngaphandle kwentuba yomuzi. Lokho ofuna ukuthi kwedlule, kungagezi ngalo umuthi. Kutshiye endlini. Kuqakathekile ukuthi bonke abanye bageze ukuze bavikeleke engozini yentuthu ezalandela. Uyingozi embi umuthi lo nxa usathunqa emalahleni.”
Esikunanzelela lapha yikuthi ingane kaKhumalo le ekhubazekileyo akukhulunywa ngayo njengomuntu, kungathi kukhulunywa ngesinanakazana esithile nje. Sizwa lapha kuthiwa, “Lokhu ofuna ukuthi kwedlule, kungagezi ngalo umuthi.” Nxa kuthiwa “kunga…” kungathi bakhuluma ngesinanakazana nje esingelancedo. Uyaphambili uMahaqaza ebiza uNkosi ngelenyamazana. “Lingaqeda ukugeza lizaqonda endlini okulele khona inyamazana yakho ufike, uhlephune isigaqana salumuthi usithi ji emalahleni.”
Lanxa inyanga zilamazwi eziwasebenzisayo ukubiza izinto ezithile kodwa ukuthi uMahaqaza abize uNkosi ngelenyamazana kubi kakhulu lokhu. Akulampilo emuntwini okhubazekileyo, yebo? Badinga ukusolwa okukhulu uKhumalo lenyanga yakhe uMahaqaza. Inyanga uMahaqaza ilokhe izama ukuzigeza ebubini bokubulala ingane emsulwa ngoba lanxa isibizela uKhumalo lokho okumele akubhadale ithi, “Induku le elizageza liphinde lithunqisele, eyiyona ozarabhula ngayo umntanakho, awuyibhadaleli ngoba angithandi ukuthi igazi elimsulwa lengane yakho lichaphakele lakimi.”
Lanxa inyanga ingafuni igazi lichaphakele lakuye kodwa layo inyanga nxa uNkosi engafa layo iyabe ibelesandla esikhulu kulokho. Lokhu inyanga uMahaqaza ezama ukuzigeza ngakho akutsho lutho ngoba nguye opha uKhumalo indlela lokuyabulala umntanakhe. Uphuma enyangeni uMahazqaza, ehaluzela uKhumalo egijimela ukuyabamba amabhasi ayakwabo. UKhumalo uthi lanxa wayelokwesaba kodwa umoya wakhe wawuchelesile ngoba kwakungezukuba mahola mangaki kungakedluli okuyisilinya kukaMaNdlovu.
Lamhla uNkosi useyisilinyana sikaMaNdlovu yedwa, yena uKhumalo usezitshiya ngaphandle okutshengisa ukuthi kamthandi uNkosi njalo kazange amthande lanini. Isifiso sikaKhumalo sizafezeka na esokubulala uNkosi?
Asikhumbuleni bafundi ukuthi uKhumalo, njengomkakhe uMaNdlovu, ubengumKrestu. Lapha siyabona ukuthi usengumhlubuki uKhumalo. Usehamba ngendlela zobubi ezobunyama.
