uMthunywa
Blessing Moyo
AMAPHOLISA aseveze ukukhathazeka ngabantu ababulalanayo elizweni lonke jikelele nanko phela kubikwa ngeviki kubalabantu abambalwa ababotshwa ngoba sebedale icala lokubulala kubangelwa yikungathembeki emtshadweni.
Kumbiko okhwitshwe ebulenjini kunkundla yokuxhumana iTwitter amapholisa abike ukuba iviki ayipheli kungela cala lobulelwe kubangwa ukungathembeki emtshwadweni osekuyinto ekhathaza amapholisa kakhulu.
Kwelinye lala amacala uNyarari Masauso oleminyaka engu-41 yokuzalwa ufele esibhedlela seParirenyatwa ngemva kokuba ehlahlelwe ngehloka emilenzeni lasesiswini ngumkakhe okutholakale ukuthi nguMuridzi nje kuphela emethesa icala lokungathembeki emtshwadweni wakhe.”
“Kudaba olufanayo njalo mhlaka 27 Nkwenkwezi uSikhangezile Tshuma oleminyaka engu-39 watholakala efile egangeni esegodini elimele umzimba wonke egwaziwe esiphaqeni ngemva kokuba exabane lomkakhe kubangwa njalo ukungathembeki kwakhe emtshwadweni mhlaka 26 Nkwenkwezi, wasetholakala efile ngelanga elilandelayo.”
“Mhlaka 28 Nkwenkwezi uRita Rore ohlala e Flem Farm, New Parliament, Mt Hampden eHarare walahlekelwa yimpilo yakhe ngemva kokuba atshaywe ngekhuba kanengi ekhanda ngumkakhe emethesa icala lokungathembeki. Umzimba kamuyi watholwa ngomakhelwane sebebikelwe yindodakazi kamuyi ukuba uyatshaywa.
uAssistant Commissioner Paul Nyathi
Isikhulumi samapholisa uAssistant Commissioner uPaul Nyathi uthe uxwayisa uzulu ukuba aqakathekise impilo zabanye abantu.
“Ngixwayisa uzulu ukuba aqakathekise impilo zabantu njalo bengaxazululi inkinga abahlangana lazo ngokulwa. Ngicebisa laba abasemtshwadweni ukuba bathole usizo ezinduneni, emapholiseni lakubakhokheli bebandla ukuze bathole indlela elokuthula yokuxazulula inkinga abalazo”.
