uMthunywa
YiNtatheli kaMthunywa
INDLELA iqonda enkundleni yeAscot ngoMgqibelo lapho amaqembu enguqu iChapungu leHighlanders azangqikilana kumdlalo weligi yeCastle Lager, sekubangwa maduze lokuphethwa kwesizini.
Umdlalo lo uza ngesikhathi iHighlanders indiza ngokudla amanye amathimu. EzikaMagebhula sezinqobe amaviki ayisikhombisa elandelana, okuyikhona osekukhukhumeze abasekeli labadlali bayo kusasele imidlalo emihlanu kulumnyaka.
Umdlalo wangoMgqibelo uyisiqalo somkhankaso wabalandeli bethimu ababika ukuthi sebezayilandela ekaMatshobana kuyo yonke imidlalo yayo.
Ukuze iHighlanders ibizwe ngokuthi ‘‘yithimu yezwe lonke’’ kuvela ekuthini ilabalandeli abagcwele ilizwe, abayibukela mihla yonke lanxa ingekho ekhaya layo eB/F.
Iphephandaba likazulu lizwe ukuba ngoMgqibelo kulamaqula abalandeli abazasuka koBulawayo belubhekise eGweru. Besekuyisikhathi eside kwacina ukwenzakala lokhu.
Lomaqhuzu weBosso uNdumiso Gumede uthe kuyabakhuthaza ukuthi abalandeli sebefuna ukuvuselela ‘‘ama-Road Show’’ kumidlalo eseleyo.
IHighlanders isele lemidlalo emibili iphandle kwakoBulawayo. Omunye wemidlalo le kuzabe kuyiFC Platinum sekusele umdlalo owodwa ukuthi inguqu ka2016 iphele.
Ukulandelwa kweqembu lokhu kubonakala kuyindlela yokusekela ngokupheleleyo ukuze abadlali bazethembe ukuthi bazanqoba yonke imidlalo eseleyo.
“Siyahamba eGweru silandele ithimu njengalokho esasikwenza kudala. AmaRoad Show la kumele abekhona nxa ithimu isikhangelane lokuthwala inkezo kanje,” kutsho umsekeli weBosso uReginald Ncube, olilunga labasekeli abazibiza ngokuthi yiBosso Heart and Soul.
UNdumiso Gumede uthe: “Kwamukelekile okwenziwa ngabasekeli bethu. Bakhuthaza abadlali ukuthi bahlale besazi ukuthi badlalela abantu. Siyababonga abasekeli.”
Umqeqetshi weHighlanders uErol ‘‘Mkabayi’’ Akbay uyaqabuka ukukhuza ithimu esenkundleni yeAscot Stadium, ikhaya leqembu leChapungu eselitshengise ukuthi akusiqembu lokudelela ikakhulu nxa idlala leHighlanders.
IHighlanders ibinqoba kanengi kumidlalo yayo leChapungu kodwa ibikhulelwa phakathi laphakathi kwenkundla.
Impumela yemidlalo kusukela ngesizini ka2014 iveza ukuthi iHighlanders yilo iqembu elikhangelelwe ukuthi liphume lemiklomelo yonke eAscot.
Kulisizini mhlaka 8 kuNkwenkwezi eMagumeni eBarbourfields iBosso yanqoba 1-0. Amathimu la ahlangana kabili ngo2015, okwakuqala mhlaka 28 kuMfumfu zaphetha zingutshiki lobhanqa. Zadibana njalo ngoMabasa ngomnyaka ofanayo lapho iChapungu eyanqoba 1-0.
Ukudliwa kweChapungu kulumdlalo kusengqondweni kaAkbay obona angathi iHighlanders iqine ngcono kulesitha sayo.
IBosso yethekelela iChapungu ihleli layo khatshana kulogu. ITshilamoya indiza kunombolo yesithathu, iChapungu yona iphakathi laphakathi kwengalane.
Ekhuluma loMthunywa phakathi kweviki, ngesikhathi elolonga abadlali bakhe, uAkbay uphikelele ngokuthi akadingi lutho ngaphandle kwemiklomelo emithathu.
“Sidinga ukuthi sinqobe. Imidlalo yonke eseleyo ngihlose ukuthi ngiyinqobe, akula okunye engikukhangeleleyo,” kutsho uAkbay.
Iloba uAkbay ubekhala ngokuthi abanye abadlali kabaqinanga, ulesiqiniseko sokuthi iChapungu izatshaywa.
“Siphakathi kwamalungiselelo omdlalo lo loba kulabafana bami ababili abalimeleyo. Ngilethemba lokuthi abafana laba bazabe sebengcono ngempelaviki ngesikhathi somdlalo,” kutsho uAkbay.
Kusenjalo iHighlanders izadlala leNgezi Platinum kuhlandla lama-semi final eChibuku kulandela ukukhitshwa koluhlu lwamaqembu aseleyo kulinkezo. IHarare City inxusa iFC Platinum komunye umdlalo.
Imidlalo yeviki lesi-26 kuligi yeCastle Lager:
NgoMgqibelo: Ngezi v Tsholotsho (Baobab), ZPC Kariba v Triangle (Nyamhunga), How Mine v Mutare City (Luveve), Harare City v FC Platinum (Rufaro), Chapungu v Highlanders (Ascot).
NgeSonto: Bulawayo City v Chicken Inn (Barbourfields), Dynamos v Hwange (Rufaro), Border Strikers v Caps United (Dulivhadzimu).
