uMthunywa
INGANEKWANE lezi njengezinye ingxenye zemibhalo engalotshwanga ziqakatheke kakhulu ngelithi ziyafundisa ngamasiko, kanye lemikhuba yesizwe, izinto okukhangelelwe ukuthi zenziwe.Ziyindlela yokuqoqa kanye lokubutha umphakathi, ziyaveza lokho uzulu akhangelele ukukubona ebantwini okufana lobuntu, uthando kanye lomusa. Ziyindlela yokukholisisa indlela ezethiwa ngayo lapho kulandelwa izenzo zabalingiswa ziyakholisisa labo abalaleleyo.
Ngesikhathi kusethiwa inganekwane abantwana abalalelayo balola ubuciko bokulandisa kanye lokusebenzisa ulimi oluqondileyo.
Ukwethiwa kwenganekwane: NgokweSintwini inganekwane yethelwa abantu abalaleleyo abahlala baqaphe balale ngeliqaphileyo. Kujayelekile ukuthi inganekwane zazisethiwa ngogogo kodwa-ke kakuzili ukuthi zethiwe yiloba ngubani ololwazi lokwetha inganekwane.
Mhlawumbe okwakusenza kube ngogogo abetha inganekwane yikuthi izikhathi ezinengi ogogo yibo ababelala labazukulu. Isikhathi esihle sokwethiwa kwenganekwane kuntambama abantu sebedlile ukudla kwantambama. Lesi yisikhathi esihle sokuzilibazisa abantu sebelindele ukuyalala baqale nje bachithe okuyisikhatshana ndawonye.
Kwakuzila ukuthi zethiwe ngesikhathi somsebenzi ngoba zazingakhuthaza ubuvila. Izolo isikhathi senganekwane bekuyisikhathi sokuhlanganisa umdeni njengoba sibona kulezi nsuku abantu bethe gwaqa begombolozele omabonakude ngesikhathi sokuziphumulela.