uMthunywa
KULELI iviki sizathi ukukhangela imibhalo engalotshwanga. Ngemibhalo engalotshwanga sikhangela leyo mibhalo okuthi ngayizolo yayilandiswa ngomlomo, kuphela singeke siyifunde engwalweni njengengwalo esizifundayo kunsuku zalamuhla kanye lemidlalo esiyibuka kubo mabonakude.
Okunye esikunanzelela ngemibhalo le yikuthi izolo bebengelabo ubuciko bokuyiloba imibhalo le loba nje sinanzelela ubuciko obuphezulu bokubumba imibhalo le.
Imibhalo le engalotshwanga ilulwazi lwemvelo, impilo, inkolo yabantu eyethulwa ngelizwi lomlomo, leyamukelwe ngendlebe. Iyimifanekiso ebanzi ngempilo ebikhona izolo kusaphila ogogo, okhulu kanye labokhokho bethu. Okumqoka ngayo yikuthi yabunjwa njalo ingabunjwa nguzulu njalo yenzelwa uzulu, yethulwa nguzulu ngolimi lukazulu ngakho yimibhalo kazulu.
Nxa sikhuluma ngemibhalo engalotshwanga sikhuluma ngokulandelayo:
(i) inganekwane
(ii) amalibho
(iii) izaga/izitsho
(iv) izinkondlo
(v) izingoma
(vi) izibongo zamakhosi
Esikunanzelelayo ngemibhalo le engalotshwanga ngokulandelayo:
Ibunjwa loba ngubani olobuciko
Iyethulwa ngobuciko bomlomo okutsho ukuthi iyatshiyelwana kusizukulwana ngamazwi.
Yethulwa ngamazwi
Igcinwa ekhanda njalo.
Impawu ezimqoka zemibhalo engalotshwanga:
Ubuciko: zethulwa ngamazwi anothisa ulimi, kulapho abantu abagwaba bagiye ngolimi lwabo nxa bezethula, lokhu kuyindlela yokuzimazisa ulimi.
Impinda: lapha kuyaphindwa amabala, njengokujayelekileyo enkondlweni, ezingomeni, kanye lasengomeni.
Lokhu kuyindlela yokugcizelela okuthile kuleyo nkondlo kumbe kuleyo ngoma.