uMthunywa
Siyaqhubeka sinanzelela amasiko kanye lemikhuba yesintu ngokuhlelwa kwemikhuba yabantu bohlobo lwesiNdebele.
Akhona amagama okwakukhonjwa ngawo umuntu kunanzelelwa isimo esithile umuntu ayabe ephakathi kwaso.
Izikhathi ezinengi kwakulamagama akhethekileyo hatshi nje ukubizwa bhadla.
Esintwini umuntu wesifazana ngumuntu olamazopha athile ngokwemvelo njalo ngalokho yiyo indlela emenza aqakatheke. Lapha sinanzelela inzalo ngokwamasiko esintu. Isigaba sokuqala yisigaba sokuzithwala.
Ngesikhathi lesi izolo bebelazo izibonakaliso ebeziyizo ebezikhomba ukuthi umuntu usezithwele, kwakuthi kungabonakala umuntu eselentembuzane elakho ukuphuma loba ngaphi ikakhulu emehlweni abantu kwakuhle kucace ukuthi kwasekulomuntu ozithweleyo, loba nje kwakungabonakala ngosana oluncane luzigcoba ngomlotha kwakungesinye sezibonelo zokuthi ukhona umuntu owayesezithwele phakathi kweguma.
Ngemva kwezibonakaliso ezingaphezulu owesifazana usethethe isisu ungena kusigaba sokwemula. Lapha-ke isisu siyabe singakakhanyi, mhlawumbe siyabe siseselenyanga eyodwa. Izikhathi ezinengi umuntu owemulayo wayenanzelelwa ngokuhlala ehlanza kuthi lokudla kwakhe wayesiba lamakhetho amangalisayo nxa esidla abadala bahle basole nje ukuthi kukhona osekutshaya amanzi lapha ekhaya.
Okunye njalo okwakunanzelelwa yikuthi ijwabu laliguquka libe butshelezi lisuke ebaleni lomuntu elijayelekileyo.
Omunye njalo umuntu wesifazana ochaza ukuzithwala wayebonakala ngobuvila, lobenyoka babusala phansi wayebhoda lemithunzi lize liyetshona ilanga. Izibonakaliso lezi yizo kanye ezichaza kanye lezibonisa ikakhulu abatsha ukuthi umuntu angabe esezithwele. Ogogo-ke besebembizela eceleni baxoxisane ngodaba lwakhe.
