uMthunywa
Siqhubeka ngokukhumbuzana ngempahla ezehlukeneyo zesintu. Ngeviki edlulileyo sifunde ngemihlobo yamacansi atshiyeneyo. Akesikhangele impahla yesiNtu ephathelane labobaba. Impahla lezi bazisebenzisa endaweni ezitshiyeneyo besenza imisebenzi eyehlukeneyo.
1. Incukuthu yinsimbi eqatha okungangomunwe. Ilesibambo sesigodo phambili kwayo lapha icijile. Incukuthu le isetshenziswa ukubhoboza izikhala emphinini yamakhuba leyezancele. Incukuthu iyafakwa eziko itshise ibe bomvu gebhu, nxa isibomvu kubhozwa ngayo lokho okumele kubobozwe.
2. Isancele sinjengehloka elidalwe okwembemba kodwa limise okwekhuba. Obaba basisebenzisa ukubaza konke nje abakubazayo ngekhaya. Sinanzelela kulezi nsuku nxa kubazwa sekusetshenziswa imtshina ethize yokubaza.
3. Umkhonto yinsimbi eyalolwa yacija, yisikhali somuntu wonke wesilisa, okukhangelelwe ukuthi lapho ehlaselwa yisilo asikhuphe agadle ngaso. Uluthi lomkhonto lwenziwe ngesigodo.
4. Umlalazi yilitshe elibutshelezi okulolelwa kilo amahloka, izancele kanye lengqamu. Ilitshe leli lidojwa emfuleni kumbe ehlathini lizebekwa ekhaya ukuze lisetshenziswe.
5. Ugcamo — uluthi lolu lubazwe lwafana lenalithi, lulesikhala ngemuva esokufakwa intambo yokuthunga.
Lusetshenziswa ukuthunga ekufuleleni indlu yotshani. Kulesiko lesiNtu-ke ukuthi owesilisa wonke abelayo impahla yowesilisa esetshenziswa ngamadoda, ngokunjalo-ke lowesifazana.
