uMthunywa
Silokhu sikhumbuzana ngempahla yesintu etshiyeneyo, ukusetshenziswa kwayo kanye lokwenziwa kwayo.
1. Ingiga ibazwa ngesihlahla somganu njalo ngeyokugigela amabele. Yiyo njalo okugigelwa kuyo amatshakada/umgqutshu. Umgigo ubazwa ngesihlahla sombondo, ithetshanene, umtshwili loba umnkantsho wephane. Umgogo usetshenziswa ukugiga amabele.
2. Ilitshe lokuchola lidingwa egangeni. Lalilungiswa likhutshwe amadlewudlewu, ngokulinganiswa litshaywetshaywe lize lilungele ukuchola
3. Imbokodo – leli litshe elincinyane elibekwa phezu kwelitshe lokuchola, bekucholwa angabe kuyini okucholwayo.
Imbokodo yanela ezandleni zombili ukuze kucholeke kuhle kukanti eyedobi ibincinyane kulaleyo eyokuchola amabele.
4. Isiqandulo lilitshe elingaphansi kwembokodo ngobukhulu kodwa lona liqinile okwedlula imbokodo. Isiqandulo ngesokutshayatshaya ilitshe lokucholela nxa selitshelela ukuze libe lamahadlahadla khona lizachola kuhle.
5. Isitshayo silungiswa ngesihlahla. Sifana lesichathulo, sisentshiswa ekulungiseni iphansi lendlu. Kutshaywa ngaso kugandelwa iphansi lendlu ukuze liqine.
6. Isilulu selukwa ngomama besebenzisa utshani selukwa sibe sikhulu okokuthi umntwana oleminyaka engaphezu kwetshumi angangena acatshe kuso. Sakhelwa ingwane sifakwe phezulu. Ngesokuphathela amabele angakabhulwa.
