uMthunywa
Siqhubeka ngokunanzelela izidalwa zemvelo ezitshiyeneyo. Besixoxa ngezinanakazana eziyimihlobohlobo ngeviki edlulileyo, sizathi-ke sixoxe ngezinyoni ezitshiyeneyo njalo sibambisisa amagama azo kanye lokudalwa kwazo lokuziphatha kwazo.
1. Ihlolanyama yinyoni elamabala amhlophe lamnyama. Inyoni lezi zithanda ukuhamba zingumhlambi. Zingaquma phambi kwakho kutsho ukuthi lapho oyakhona uzafica kuhlatshiwe, uzafica kulenyama. Kulemibala yamalembu abizwa ngalezi zinyoni.
2. Ijuba — kulemihlobo emithathu yamajuba. Kulejuba elilentamo ebomvu kuthiwa nguntanyana, njalo lilomzimba omhlotshana. Likhona njalo ijuba elikhulu eliluthuli olufuna ukuba bomvu. Likhulu njalo lithanda emfuleni.
Kubekhona elimhlophe elilomzila omnyama oquma intamo, leli balibiza bathi nguthayi.
3. Ikhwezi — inyoni le imnyama njalo iyacazimula. Iyalingana lomantengwane ingaphansi nje kwejuba. Inyoni le iyadliwa. Zikhona-ke izinto ezilombala othathelwe kulo owekhwezi.
4. Ilanda yinyoni emhlophe nke. Uzifica zihamba zinengi zilandela umhlambi wenkomo, lapho ezihamba zizidobhela imikhaza lezibungu. Inyoni le kayidliwa njalo inkulu okungangesikhwehle. Uyalifica njalo lizidobhela intetshana ezethuswa zinkomo.
5. Yinyoni enkulu okwamagama ephose ilingane lensingizi, lilombala ophose ubemnyama kodwa amanye amhlotshana. Inyoni idla inyamazana ezifileyo. Lapho okufele khona inyamazana kubonakala ngawo egcwele ezihlahleni.
