uMthunywa
Silokhu sikhumbuzana ngezinanakazana zasendle ezitshiyeneyo.
Ezinye zakhona esasilokudibanisa amabizo azo singelalwazi olupheleleyo kodwa nxa sikhumbuzana ngaloluhlobo umehluko siyawunanzelela.
1. Intombi zakomhlahlandlela kuphosa kufanane lobunyonyo kodwa khona kukhudlwana njalo kubomvu njengenhlamvu zophoko.
Zona-ke zingavele zizwe ubumanzi phansi kulapho eziphuma khona ikakhulu ungananzelela phansi komendlalo wabantwana abachemayo, ziyaphuma zigcwale ngobunengi bazo zithi lokubantinyela.
2. Umuhlwa wona-ke mncinyane kulamagenga, udla ulutho ngokubumbela inhlabathi kulo.
Umuhlwa udla yonke into elele phansi kumbe engahambiyo.
Izikhathi ezinengi sithi umuntu sedliwe ngumuhlwa sisitsho ukuthi kasekho.
Ukuziphatha kwezinanakazana lezi siyakusebenzisa kunkulumo yensuku zonke.
3. Amatsheketsha wona-ke alombala oluthuli, aphose nje alingane lempolompolo, atholakala ezikwakweni kakhulu.
Ngesikhathi sokutshisa uyawathola egijigijima indawo yonke.
4. Inswintila zinkulu okwedlula ubunyonyo njalo zimnyama ziyantinyela okubuhlungu.
5. Umuvu uyaphapha, umnyama, ulokhalo oluncinyane njalo uthanda ukwakhela indlu entungweni lasemdulini wendlu. Indlu yawo yakhiwa ngenhlabathi.
Abenkolelo bathi ayibulawa leyondlu ngumntwana oyinkazana ngoba uzahlala ewisa izinto.
