uMthunywa
Ngeviki edluleyo saxoxa ngokudla okutholakala emangweni okudliwa ngabafana belusile.
Sixoxe ngempukane ezitshiyeneyo kuviki edlulileyo sinanzelela ukuthi zonke simane sizibize ngokuthi zinyosi nje, kanti kulomehluko ezinye asisakwazi lokuthi zibizwa kuthiwani.
Inyosi ziyafana lempukane lezi esiziqambe ngeviki edlulileyo. Esikunanzelelayo yikuthi inyosi zona zinkulu kulazo zonke. Inyosi zona ziyaluma umuntu avuvuke sibili, abanye ngokuswelakala kwenhlanhla bayafa. Inyosi zakhela embalwini zezihlahla zakhele kanye lasemlindini wazo ebhalwini.
Inyosi-ke zona ziyathatshwa. Ngakho kuthiwa bathapha imasi, imbongolwane, kodwa nxa bethapha inyosi kumele baqale bazidakise ukuze zingabalumi.
Ukudla kwabafana konke lokhu babengafiki lakho ekhaya, kodwa nxa zehlisile kumbe yona imasi loba ibhotshi babedinga ixolo lesihlahla bafake kulo ukudla lokhu bahambe lakho ekhaya.
Uluju lwenyosi yilo njalo esilunatha etiyeni kulezinsuku kukanti lomuntu olohlupho lwesifuba ulakho ukunatha uluju lwenyosi asile.
Kudala wawufica abafana bethakazelela kakhulu ukuya ekweluseni belanda ukuyadlala imidlalo yemangweni kanye lokudla lokhu okutshiyeneyo.