uMthunywa
Sisaqhubekela ngezifenqo zenkulumo, okuyindlela yokunonisa ulimi lwethu sigcizelela kulokhu okutshiwo ukuze kuzwakale kulesisindo.
Sikhangela ihaba;
Lapha silichaza sithi yindlela yokukhuluma okusakwedlulisa amalungelo ukuze kwakheke umfanekiso othile okwenza lokho okukhulunywayo kuvele ngamandla amakhulu. Nanzi izibonelo:
i) Kancitshi nje uMaDube uncweba ufudu lubhense.
ii) Esigabeni sakithi abantu sebephelile du umkhuhlane ubhokile. Ngenyanga ephelileyo kufe abantu abathathu.
iii) Ngihleke kwaze kwababuhlungu imbambo.
iv) Ngibafice bejamelane lentaba yesitshwala bayilehwelola baze bayilahla phansi.
v) Inkomo le ayinonile nje iyapatshaka.
Izibonelo ezingaphezulu zisivezela umfanekiso othe bha ngalokho okukhulunywa ngakho, okuchazwe ngendlela edluleleyo.
Umehluko okhona phakathi kwehaba lesingathekiso.
Isingathekiso sithi ulutho luyikuthi, njengokuthi ungamthembi umfana lo yinyoka yomuntu, lapha umfana uchazwe njengenyoka eluma abantu belibele.
Ihaba lona liyakhulumisa ulutho ludlule lokho oluyikho khona.
Isibonelo: UDube bamthethe kanye ngesibhakela wahle woma qha. Sibona umfanekiso womuntu ohle zhi woma qha.
Kwandile ukuthi inkulumo elihaba siyinanzelele njalo injengenkulumo engamanga ngenxa yomfanekiso odalekayo kuleyonkulumo kodwa kungasimanga.
