uMthunywa
Ophezulu Stinta
Sisaqhubeka ngezinyoni ezitshiyeneyo
INSINGIZI zinyoni ezinkulu ezimnyama ezilentamo ebomvu. Kukholwa ukuthi zingatshona zikhala kuvuka kumakhaza, kufefeza kumbe kune izulu. Kazidliwa inyoni njalo kayiqumi ekhaya.
Udwayi Yinyoni enkulu elenyawo ezinde. Ilensiba ezinhle kakhulu njalo yinyoni engathandi ingcekeza. Kulapho okuvela khona isaga esithi udwayi ufa lensiba zakhe.
Umantengwane yinyoni emnyama okuluhlaza kodwa ithubile kayicazimuli njengekhwezi. Umantengwane utshaya ukhwelo njengomuntu njalo kuthiwa welusa inkomo. Inyoni le iyadliwa, kukanti futhi yinyoni ephangisa ukuvuka, ivusa abantu abanengi.
Umguwe — ibizo lithathelwa ekukhaleni kwayo. Umguwe ulesicholo ekhanda esiyingwegwe. Abanye bathi umguwe udliwa umhlubulo owodwa ngoba umunye uyababa.
Umkhombazane ngumhlobo wejuba elincinyane elithanda ukuzifihla, kukholwa ukuthi umkhombazane ulezifayifa ngakho kawudliwa ngabantwana ngoba kukholwa ukuthi bangathatha umkhuhlane lo.
