uMthunywa
Ophezulu Stinta
KULELIVIKI sizaxoxisana njalo kabanzi ngezigaba ezine zomnyaka. Sinanzelela okulapho okuphawulwa khona inguquko ezithile.
(1) INTWASA
Isikhathi lesi sibonakala lapho izihlahla ziqala ukuqhuma. Isihlahla somganu yiso esivame ukuba yisibonelo sentwasa. Emkhathini lapha kuba lenkanyezi ezingamayezana amabili ezansi komkhathi lezinkanyezi okuthiwa lihlobo lobusika. Ihlobo yileyo eba sesandleni sokhohlo ubusika esandleni sokudla. Ilanga ngalesi sikhathi lihambela phakathi laphakathi komkhathi lapha kuyabe sekutshisa okwamagama.
Sibuyela njalo ekuhlumeni kwezihlahla lapha kuyananzelelwa izihlahla ezizeleyo ngoba lazo ziletha ingcazelo thize.
Izihlahla ezifana lesigangatsha lomhagawuwe nxa zizele kakhulu kuhle kucace ukuthi lowomnyaka ulezulu njalo lokho kutsho inala. Inyamazana ezifana lempunzi nxa zizele kakhulu lazo zibika inala, okunye njalo okubika ubunengi bezulu yikuzala kakhulu kwembuzi isikhathi sentwasa siphela lapho izulu selisewula sesingena ehlobo okulezulu elilomoya njalo liduma kakhulu.
(2) IHLOBO
Nxa sinanzelela emkhathini lapha, izulu liyabe lilokhu lisanda kukanti inkayenzi yebusika iyabe isinciphile sekukhula ihlope. Emangweni lapha kwenile okwamagama ngalesi sikhathi. Nxa sikhangela emasimini lapha likhaba lodwa ezinye indawo-ke kuyabe sekufuna ukukhahlela, lisiyaphela ihlobo abanye bayabe sebechinsa umumbu lamakhomane. Lapha-ke izulu lakhona kalisadumi kakhulu njengele ntwasa.
