uMthunywa
KULELIVIKI sizaxoxisana ngemihlobo yezinyoni ezitshiyeneyo. Ezinengi zakhona sesizibona kubomabonakude ezinye zakhona asisakwazi ukubona sezathuthela kude mhlawumbe ngenxa yokutshintsha komumo womkhathi, lokuguquka kwesikhathi.
1 Ihlolanyama yinyoni elamabala amhlophe lamyama. Lezi inyoni zithanda ukuhamba zingumhlambi kukhona njalo amalembu abizwa ngemibala yalezi zinyoni. Abanengi kabayidli inyoni le.
2 Ijuba — kulemihlobo emithathu yamajuba (i) kulontanyana ijuba elilentamo ebomvu, umzimba walo uluthuli olumhlotshana (ii) kule vukuthu leli lijuba elikhulu eliluthuli olufuna ukuba bomvana likhulu njalo lithanda emfuleni. Kukhona njalo elimhlophe elilomzila omnyama oquma intamo. Abanye leli balibiza bathi nguthayi.
3 Ilanda yinyoni emhlophe nke. Zithanda ukuhamba zinengi zilandela inkomo zidobha imikhaza lezibungu. Ilanda likhulu okungangesikhwehle, kalidliwa. Lihamba lidobha intetshana ezethuswa zinkomo nxa zisidla.
4 Ilinqe yinyoni enkulu sibili efuna ukulingana lensingizi. Alombala ofuna ukuba mnyama kodwa amanye amhlotshana, zinyoni ezidla inyamazana ezifileyo. Amanqe alakho ukubona inyamazana esifuna ukufa ahle ayilinde ize ife ithi ingafa ahle ayikhwelele. Lapho okufe khona inyama kubonakala ngawo amanqe.
