uMthunywa
SIQHUBEKA ngokunanzelela imihlobo etshiyeneyo yezaga zethu lapho esinanzelela kakhulu khona imvelaphi yazo. Silokhu silandela izaga ezithathelwa enyamazaneni ngokudobha izibonelo ezitshiyeneyo. Sithathe isaga esithi, into yomuntu ngumhluzi wempisi.
Ngokujayelekileyo impisi yinyamazana engadliwayo njalo engela kwenza lokudla, okwenza kubenzima lapho ulutho oluthile selufananiswa lomhluzi wempisi.
Kukhona okungamukelekileyo lapha nxa sikhangela umhluzi wempisi njengoba abaziyo besithi ngomdabuko umhluzi wempisi vele uluhlaza tshoko njengamanzi omthombo, awudleki. Okutsho ukuthi ngelikhaliphileyo, into yomnikazi kayilandima, kayilabuhle njalo umuntu angazi jayezi ukuphila kumbe ukuthemba into yomnikazi. Ngoba nje uyayemukwa ungalindelanga usale ubambe umoya.
Sithathe esinye isibonelo sesaga esithi, inqina liphuma embizeni. Inqina yinyamazana ehlala egangeni njalo iyazingelwa izingelelwa yona inyama yayo emnandi. Abantu bayayithanda okwamagama inyama yenqina.
Ngakho ngesaga lesi-ke kusobala ukuthi yinto emnandi eyabe isiphunyuke umuntu, kuthathelwa ekuthini umuntu ubesekhangelele okumnandi abasekwehluthelwa nje engalindele, yilo inqina lelo, umuntu uyathi lapho esezibonela isitshebo lona liphunyuke embizeni.
Sinanzelela lokuzingelwa kwayo inyamazana le okuthiwa linqina, akulula ngoba kasizo zonke inyamazana ezenelisa ukuyisekela zize zilibambe, kudingeka izinja ezibukhali ezizenelisa umsebenzi wazo okugcizelela ukubaluleka kwenyamazana le.
