uMthunywa
Amalungelo lemilandu yethu sonke silo Pumulani Mpofu
Izikhathi ezinengi nxa abantu bethandana bandise ukwenzelana izinto ezinengi ezitshiyeneyo. Abanye bayathengela izithandwa zabo izindlu, abanye imota, abanye impahla yendlini abanye eyokugqoka. Kukanti abanye bayahanjiswa emahoteleni adulayo besiya kumakhefu.
Nxa isithandwa sisenzela omunye waso lokhu, kuyabe kuyikufuna ukumjabulisa lokumtshengisa ukuthi umthandile okweqiniso njalo uzimisele ukuthi kuze kufike ibanga lokuthi bathathane. Pho nxa isithandwa sakho sakuthengela imota, nxa selisehlukana sokumele uyibisele na imota leyo?
Kule iviki ngithole ithuba lokuxoxisana lejaha lakoHlumbayo uTony. Ijaha leli lalithandana lentombi yakoNgulube uRebecca. Bathandana okweminyaka emibili bengakathathani. Wahamba wayavela walobola uTony bahle bayaqala impilo yabo njengomuntu lomkakhe kweleSouth Africa. Kwathi umnyaka olandelayo babusiswa ngendondakazi uAyanda. Njengoba uRebecca wayengasebenzi njalo ekhanya elesiphiwo sokuluka uTony wamvulela i-salon.
Kwaba lenjabulo koHlumbayo ngoba bobabili basebeletha inzuzo endlini. Kwadlula iminyaka babusiswa ngendodana uNtabiso. Kwathi ngemva komnyaka uTony waphelelwa ngumsebenzi, yahle yaqala ingxabano kulo umuzi.
UTony uthe uRebecca wayengasamhloniphi eselala engekho endlini esemgidweni yena emunyisa. Uthe wayesithi nxa emkhuza umkakhe athi ngeke atshelwe lutho ngumatshayinyoka. UTony esebona ingani kungamhlupha wathi kungangcono babuye bonke eZimbabwe. Lakanye balaywa kwaba kuhle kwabanjeyana. Kwathi sekumele bayethathela abantwana ama-birth certificates, bathola ukuthi babekhohlwe ama-health cards abantwana eSouth Africa.
URebecca wathi kungangcono yena abuyele ukwenzela ukuthi ayebona lokuthi zazihamba njani izinto e-salon.
Wahamba waloba waze wavumbuluka ngemva kweminyaka emithathu. Lakho ukuthi aze abonakale wayedibane lomalumakhe kaTony. Ngaleso sikhathi wayesezithwele umthwalo wenye indoda kungumuntu okwasekumele ayetshada. Ngokuzwa ukuthi wayelendoda eZimbabwe, ijaha likaRebecca lahle lamala ngoba wayengayitshelanga leyondoda ukuthi wayendile.
URebecca wabuya wazobelethela eZimbabwe, wabuya lama-health card abantwana. Wonela ukuthatha i-passport waphinda wadliwa ngumswenya futhi. Esenza njalo etshiyela uTony umntwana. Kwahlala inyanga ezimbalwa bathi bethintitha impahla zakhe bakhona bebona ukuthi uRebecca wayetshiye isithupha sakhe njengoba yiso ababesifuna ukuthi bayethathisa abantwana incwadi zokuzalwa ngoba abantwana basebefunda bengela ncwadi zokuzalwa.
Njengoba wayengaziwa ukuthi ungaphi engatshayi ucingo abangakibo baya emapholiseni bayamangala ukuthi uRebecca abakwazi ukuthi ungaphi njalo babefisa ukuthi bathathise abantwana incwadi zokuzalwa. Njengoba basebelencwadi evela emapholiseni, njengenhlanganiso saxwayisa uTony ukuthi adinge imali engange$55, i$5 eyiyo ayezayibhadala emapholiseni eyaziwa ngokuthi yi-admission of guilt ngoba babebuye lomntwana engela passport.
I-$50 yiyo ayezayisebenzisa ukubhalisa umntwana oyedwa, njengoba babebabili wayefuna i$110. Phezu kwemali le, kufuneka ama-health cards abantwana, isithupha sikaRebecca, esakhe kanye lesihlobo sikaRebecca esiseduze esilesithupha okuyiso esizamncedisa ukuthi athole incwadi yokuzalwa.
Kuqakathekile ukuthi abantu balungise incwadi zokuzalwa zabantwababo masinyane. Kunengi okungenzakala ngemva kwamaviki ayisithupha. Kubangcono ebazalini abatshadileyo.
Asihlanganeni ngeviki elizayo
Umlobi utholakala kunombolo zocingo ezithi 0773195055 lakukheli elithi [email protected].