uMthunywa
Ethel Ncube
ZIKHATHAZEKILE izakhamizi zeBinga ngempilakahle yazo nanko phela isibhedlela seKariyangwe Mission Hospital kasiladokotela njalo labongikazi bayasilela okucina kubangela ukuthi sandelwe yizigulane.
UMthunywa uzwe ukuthi isibhedlela lesi silabomongikazi ababili nje kuphela kukanti kulabantu abavela kumawadi amahlanu abelatshwa kiso.
Ngaphandle kokusilela kwabomongikazi kubikwa imithi kanye lamaphilisi lakho akutholakali esibhedlela lesi. Iphephandaba likazulu likhulumisane lesinye isakhamuzi uMnumzana Michael Mwembe obike ukuthi omongikazi balutshwana kakhulu esibhedlela lesi.
“Isibhedlela sethu sigcwele abancedisi babomongikazi okwenza kube nzima ukuthi basincedise nxa sigula ngoba bengelalo ulwazi olufaneleyo.
“Lokhu kuyasikhathaza njengezakhamizi ngoba imikhuhlane icina isiyaphambili kukanti abanye njalo bacina besifa ngoba beselatshwa ngabantu abangelalwazi oluqondileyo,” kulandisa uMnu Mwembe.
Uqhubekele phambili eveza ukuthi omongikazi abangaphansi kogatsha lwezempilakahle bayandelwa ngumsebenzi.
“Silabomongikazi ababili kuphela abasebenza ngaphansi kogatsha lwezempilakahle kanye lokondliwa kuhle kwabantwana esibhedlela sethu okwenza kube nzima ukuthi belaphe bonke abantu kungakho sicina sikhangelwa ngabancedisi babo (nurse aid) abangela lwazi olujulileyo okwenza wonke umuntu acine ephiwa amaphilisi okuqeda ubuhlungu kungakhathalekile ukuthi ubulawa yini,” kuchaza uMnu Mwembe.
Intatheli ibuye yakhulumisana lesinye njalo isakhamuzi, uNkosazana Edith Zinyane ogcizelele ukuthi balohlupho lokusilela kwabomongikazi.
“Omongikazi esilabo kasibasoli kodwa sicela uhulumende angezelele inani labo ngoba isibhedlela sethu sikhulu,” kulandisa uNkszn Zinyane.
Ekhuluma lentatheli uSenetha wezinduna zesabelweni seMatabeleland North, induna uSiansali uveze ukuthi bafuna abanye omongikazi esibhedlela seKariyangwe.
“IKariyangwe Mission Hospital kayila dokotela njalo labomongikazi bayasilela ngoba kulabantu abanengi abelatshwa esibhedlela lesi abavela kumawadi amahlanu.
“Isibhedlela sethu silamawadi okulalisa abantu kungakho omongikazi esilabo bacina besandelwa ngumsebenzi yikho nje sicela uhulumende angezelele abanye omongi njalo asilethele lodokotela,” kuphetha induna uSiansali.
