uMthunywa
YiNtatheli kaMthunywa
UMQONDISI weZimbabwe Sotho Development Initiative (ZIMSOD) uNkosikazi Maretha Dube usekhuthaze abazali kunye lalabo abakhangela abantwana ukuthi baqakathekise ukukhuluma indimi zakithi ngekhaya.
Kusitatimende sokunanza usuku lwe-International Mother Tongue Day, uNkosikazi Dube onguMgcinisihlalo weZimbabwe Indigenous Languages Promotion Association (Zilpa) aphinde abe ngumsizi wokuhlolisiswa kolimi eMidlands State University National Language Institute (MSNLI) uthe abantwana akumelanga bafunde ulimi lwebele esikolo kuphela.
Usuku lokunanza indimi zonke ezikhulunywa emhlabeni luba khona mhlaka 21 Nhlolanja njalo luqoqwa yi-Unesco. Lonyaka usuku lolu lukhunjulwe ngaphansi kwendikimba ethi: Multilingual Education — a necessity to transform education okutsho ukuthi, Imfundo ngendimi zakithi — indingeko ekuguquleni ezemfundo. Indikimba le ikhuthaza ukuthi kufundiswe langendimi ebezikhangelelwa phansi.
“Indikimba yalonyaka ikhuthaza ukufundiswa kwendimi ezitshiyeneyo ezikolo. Phezulu kwalokho kuyadingeka ukuthi lathi njengomphakathi kunye labazali siziqhenye ngendimi zakithi. Akumelanga siyangeke ngendimi zakithi kodwa kumele sikhululeke ukuthi sizisebenzise.
“Kasikhulumeni indimi zakithi emphakathini kanye langekhaya. Abantwabethu kumele bazi ulimi lwethu lwangekhaya kuqala. Akumelanga bafundiswe ulimi lwangekhaya esikolo. Ulimi luyingxenye yobuntu bakho ngokunjalo kasibeni leqiniso lokuba abantwabethu bayazi ubuntu babo,” utsho njalo.
UNkkz Dube uphinde wakhuthaza indawo zikaHulumende zomphakathi ezifana lemthethwandaba ukuthi zibe lendimi zonke ukuze ziphathise uzulu wonke jikelele. Uthe uHulumende usenze imizamo eminengi yokuphakamisa indimi ezazikhangelelwa phansi elizweni.
