uMthunywa
UKUVULWA kwezikolo kuthemu yokuqala yomnyaka yisikhathi esibuhlungu njalo esididanisa amakhanda abanengi. Ithemu le imbi ngoba iqala ngemva kokuvalelwa kwabantu emakhaya kubangelwa lubhubhane lweCovid-19.
Abantu abanengi bebengasebenzi kusukela kuqala umnyaka ngoba ikhefu leKhisimusi kunye lokuqala komnyaka omutsha lathi liphela uMsekeli kaMongameli welizwe uDokotela Chiwenga wahle wabika ukuthi ngenxa yokuqansa kwenani labantu abasebebanjwe yi-coronavirus kwakubalulekile ukuba abantu bavinjwe emakhaya ukuze kwenqatshelwe ukumemetheka kwawo.
Abazali abanengi ikakhulu labo abalabantwana abaqala ugwalo lokuqala, uECD kumfundo yaphansi kanye labaqala uFomu 1 bagijima besiya le lale belungisela abantwababo ukuze baye esikolo.
Ekuvulweni kwezikolo kuba yisiphithiphithi edolobheni abazali bebhoda ezitolo bedinga impahla zesikolo. Okusuka kube buhlungu yikuthi impahla lezi ngalesi isikhathi ziyabe sezikhweziwe lentengo abazali bazicuthe baze basale sebemsulwa bezama ukuthi abantwababo bathole imfanelo zesikolo.
Sengathi ukuthenga impahla zesikolo akwenelanga, umzali uphinda azikhwathaze esedinga amapeni okubhadala imali yesikolo.
Izikolo ezinengi nxa zivulwa ziyabe zikhangelele ukuthi umfundi wonke athutshe ephethe ama-receipt akhe atshengisa ukuthi usebhadele i-school fees, nxa lokhu kungenziwanga uhle aphendukele entubeni yesikolo.
Nxa umfundi engayibhadalanga leyo mali uyaxotshwa esikolo. Akuthokozisi ukubona umntwana engayi esikolo kumbe eswela impahla yesikolo kumbe ehamba esikolo ngenyawo ngenxa yokuthi abazali bakhe abamenzelanga imfanelo zesikolo.
Lokhu kwenza umntwana abuyele emuva kuzifundo zakhe kukanti ngasikhathi sinye lokhu kumenza angathandi isikolo nanko phela abanye abafundi bayabe sebemchothoza bethi mhlawumbe ngakibo bayahlupheka.
Abazali abalabantwana abafunda behlala ezikolo bona-ke bahlaba umkhosi ngokuphindiweyo ngoba bayabe bekhangelelwe njalo ukuthi bathengele abantwababo ukudla abahamba lakho esikolo.
Ingqobe zikithi sonke abazali ukuthi silungisele abantwabethu konke okufunakalayo esikolo ukuze bayefunda njengoba nje insuku sezihambile ngenxa yobhubhane lweCovid-19 olulokhu luphakathi kwethu.
Njengoba nje abafundi ababhala lonyaka bevele sebeqalile izifundo zabo kungumlandu wethu njengabazali ukuthi sikhuthaze abantwabethu ukufunda ingwalo zabo ngoba yiyo kuphela indlela engenza baphumelele ezifundweni zabo.
Ingqobe iya njalo kumfundi munye ngamunye ngemva kokuba umzali esembhadalele imali yesikolo, wathenga impahla zesikolo kubalulekile ukuthi afunde izingwalo eqinile ukuze aphume lemiklomelo emihle ezajabulisa abazali bakhe loba isikhathi sokufunda sizakuba sifitshane lonyaka.
