uMthunywa
Brandon Moyo
AMA-Chevrons amancane azaqalisa uhambo lwabo lwe-2024 International Cricket Council (ICC) Men’s Under-19 Cricket World Cup ngokuzithemba okukhulu ngemva kokunqoba imidlalo yabo yokuzilungiselela esemthethweni.
Iqembu leZimbabwe Under-19s linqobe eleUnited States of America (USA) ngama-runs alitshumi lambili (D/L Method) ngoLwesibili ukuqeda amalungiselelo abo ngobunono obukhulu okuzabenza bezethembe lapho sebeqalisa ukudlala kundebi yomhlaba.
Ukunqoba kwabo iqembu leUSA bekungokwesibili emalangeni amathathu. Baqala ngokunqoba ontanga babo baseIreland ababehlula ngama-runs angu 27 (D/L Method). Imidlalo le ibihlanganiswe yiICC ukwenzela ukuthi abasakhulayo belungiselele umncintiswano omkhulu oqalisa ngoLwesihlanu.
Umncintiswano weWorld Cup uzadlalelwa eNingizimu Africa (South Africa).
Ngemva kokunqoba kumidlalo yabo emibili edluleyo, abafana beZimbabwe njalo bathole ugqozi komunye wamaqhawe abo, u Richard Ngarava odlalela ama Chevrons. Ungarava, ose Sri Lanaka lama Chevrons njalo owake wadlalela ama Under-19 akuleli ngesizini ka-2005/06 ubafisele konke okuhle kumkhankaso wabo wendebi yomhlaba.
Uphinde wahalalisela abadlali abakhokhelwa ngu-Matthew Schonken ngokubizwa ukuthi beyemela ilizwe labo leZimbabwe ezingeni eliphezulu lama-Under-19. “Kuhle ukubizwa ukuthi limele iZimbabwe kundebe yomhlaba yama-Under-19. Kumele litshaye ama-runs, lithathe amawikhethi libambe lamabhola amangalisayo, lidlale ngobunono obukhulu bafana. Kumele lijabulele limiselele yokumela ilizwe lenu. Ngilifisela konke okuhle kakhulu, libuye lenkezo ekhaya bafana,” kutsho uNgarava.
Ama-Young Chevrons aku Group C wendebe yomhlaba kanye leAustralia, Sri Lanka leNamibia. Iqembu leZimbabwe, eliqeqeshwa nguProsper Utseya lizadlala umdlalo wabo wokuqala mhlaka 21 leSri Lanka eKimberley Oval edolobheni eliseNorthern Cape. Besuka kuSri Lanka bazadlala leAustralia mhlaka 25, besekusithi owokucina kube yiNamibia mhlaka 27 eKimberly Oval njalo.
Ku Group A wendebe yomhlaba kule India — abawine linkezo kumaphuzu amahlanu — le Bangladesh, leIreland kanye le SA. KuGroup B kukhona iSouth Africa, England, West Indies leScotland besekusithi uGroup D abe leAfghanistan, Pakistan, New Zealand leNepal.
Amaqembu amathathu aphezulu ku-group ngayinye azadlulela phambili aye esigabeni seSuper Six (amaqembu alitshumi lambili behlukaniswe babangama Group amabili alamaqembu ayisithupha). Kusuka kuSuper Six, kuzayiwa kuma semi-final le-final edolobheni leBenoni.
