uMthunywa
Cornelius Luphahla
Kulamajaha eqembu lembube elithiwa yiMen of Influence asetshengise ukuthuthuka kwezomculo nanko phela kunyanga ephelileyo apheke idlalade elilengoma ezimnandi okwamagama.
Iqembu leli kubikwa lasungulwa ngamajaha angu-8 ahlala elokitshini leLobengula ngenhloso yokujabulisa abantu kanye lokuthuthukisa umculo wembube koMthwakazi.
UMthunywa ukhulumisane lesikhulumi saleliqembu ongomunye walababaculi uMthandazo Nyoni ochaze ukuthi iqembu labo selileminyaka embalwa balisungula.
“Iqembu lethu salisungula ngomnyaka ka 2010 ngemva kokuba sibe lomkhosi owawukhuthaza ukuthi obaba baveze ukuqakatheka kwabo empilweni owawusenkonzweni yethu iBretheren In Christ Church. Yikho ke lathi sathi kungcono siveze iziphiwo zethu njengamadoda sasesisungula iqembu lethu leli,” kutsho uMthandazo.
“Thina sicula singamajaha angu-8 agoqela mina, uMlindeli Moyo, uMthabisi Ndlovu, uPolite Ntini, uDesmont Tshele, uObvious Ncube, Richardo Mhunga kanye loWishes Madondo.
Uqhubekele phambili wathi iqembu labo selakhipha idlalade njalo umculo wabo kukhanya abantu bayawuthakazelela kakhulu.
“Njengeqembu labaculi lonyaka sikhiphe idlalade elilodwa elithi ‘Ngomhla wenjabulo’. Lelidlalade lisivezele sobala ukuthi abantu bayawujabulela umculo wethu ngoba bonke abawuthengayo bayasifonela besincoma ngomculo wethu lo.
“Esikhathini esinengi sandise ukucula emitshadweni, emikhosini efana lamadili kanye leminye nje imikhosi ethile lapho abantu abadinga ukuzojabuliswa ngokuculelwa,” kutsho uMthandazo Nyoni.
UMqondisi waleliqembu uMlindeli Moyo ubike njalo ukuthi khathesi bakhangelele ukukhipha IDVD ukuze abantu bazibonele abakwenzayo njalo sebezaphatheka kumincintiswano ethile.
“Khathesi sikhangelele ukukhipha i-DVD ukuze abantu bazibonele ukudla kwamehlo bengabe bekuzwa ngendaba noma nje sikhathazwa yikuswela imali yokuzithuthukisa kwezomculo.
Okunye njalo sifuna ukuqala ukwenza imicimbi yethu ukuze abantu basibone mathupha njalo sibajabulisa.
“Okunye njalo sikhangelele ukuthi sivakatshele indawo ezehlukeneyo sizwisa abantu umculo wethu njalo sibajabulisa,” kutsho uMlindeli Moyo.
