uMthunywa
YiNtatheli kaMthunywa
UMDLALI weHighlanders uKasimero Chimbadzwa usebike ukuba ukuza kwakhe kuqembu leli kuzamenza abengumdlali ongcono njalo kalasifiso sokuyadlala kweyinye indawo okwamasizini amathathu alandelayo.
Ukhulume lokhu ebuzwa ngakukhangeleleyo kuthimu yezwe lonke, iqembu aphenduke kulo ngemva kokukhalala ukulidlalela ngenxa yokuthi wayephiwe ‘imali encane’
UKasimero usuke kuZRP FC nge$1 500.
Umgadli lo ubonakale elethalenta elizavala isikhala mhla uKnox Mutizwa esiya kuBidvest Wits phakathi komnyaka.
UKasimero ubikele iphephandaba likazulu ukuba loba ekuqaleni kwalisizini inhliziyo yakhe ibingahlalisekanga kuBosso, okwamanje angeke abuyele muva.
Uthe sefuna ukugcwalisisa iphupho lakhe lokubangumdlali ozabatshazwa izwe lonke kuligi yeCastle.
Umdlali lo, ngokutsho kwabaqeqetshi beHighlanders kuliviki, uKasimero ubalelwa njengomunye wabadlali abasebenza nzima phambili kwenkundla.
“Ukuphenduka kwami kuBosso kuzangivulela amathamsanqa ngoba sengizibona ngidlala ngcono.Umdlalo wami wakudala usuphendukile, ngizizwa ngisekhaya nxa ngileHighlanders.Angiboni ukuba ngingaya kweyinye ithimu,” kutsho uKasimero.
Lo mqeqetshi uErol Akbay uthe uyasuthiseka ngehalenta lalumdlali.
“Angisoli lutho ngoba uyawazi umdlalo. Ubizwe eqenjini ukuthi azohlohla, ngakho kumele akwenze lokho.”