uMthunywa
UMAQHUZU wekhomithi ebona ngezemidlalo iSouth African Sports Confederation and Olympic uTubby Reddy secande indledlana kaOscar Pistorius ukuthi aphiwe ithuba lokuphatheka kumncintiswano ozakwenziwa ngo2020 eTokyo kweleJapan.
Exoxisana leMail Online yaseUK uchaze ukuthi akulankinga ngombono wokuthi i“Blade Runner” iphenduke emncintiswaneni ukuzomela ilizwe layo.
Lokhu kuzenzeka kungelani lokuthi wagwetshwa iminyaka eyisithupha ngemva kokutholakala elecala lokubulala isithandwa sakhe uReeva Steenkamp ngeValentine ngomnyaka ka2013.
“Uzabe esehlawulile esigabeni njalo esephendukile esephila impilo efana xathu leyomuntu wonke nje eSouth Africa.
“Awukho umthetho onqabela ukuthi engaphatheki emncintiswaneni le,” kugcizelela uReddy.
UPistorius (29) ukhangelelwe ukuthi uzasebenza gadalala entolongweni okweminyaka emithathu kuphela phakathi kweyisithupha ayigwetshwayo.
Lokhu kuchaza ukuthi uPistorius uzazuza ithuba elenela ngqe umnyaka elolongela imincintiswano ka2020.
Isikhulumi seSascos sikhuluma leSport24 ngoMvulo sithe ngeke siqhubekele phambili sixoxa mayelana ngaloludaba.
UPistorius sewathatha imendulo zegolide eziyisithupha lokhe waqala ukuphatheka kumincintiswano yabaphila lobugoga kanti njalo ngomnyanga ka2012 nguye owaphakamisa isizwe seSouth Africa kumincintiswano eyanzakala eLondon.
Ngomnyaka ofanayo wanikezwa isicoco seLaureu World Sports sokuba yitshantshu yomnyaka kumincintiswano yabaphila lobugoga. — Ubulembu
