uMthunywa
Nkosilathi Sibanda
I-HIGHLANDERS iyehluleka ukuthola imiklomelo egumeni layo leBarbourfields kodwa izangena umango isiya kuFC Platinum ithembele ukuthi abagadli bayo balole zacija inyawo.
Kusegcekeni ukuthi izathwala luklubhu imelane lentshantshu zomdlalo womnyaka odluleyo.
Ngalelolanga kukhangelelwe ukuthi umqeqetshi weBosso uMadinda “Khathazile” Ndlovu avule amehlo ngoba iqula leFC Platinum alisoke livume ukwehliswa lona selidlala ngamandla kulezinsuku.
I-FC Platinum isihambe isibanga eside ngokudlala inguqu nanko phela iyakhokhela kungalane yeCastle Lager.
UMadinda uyaqala ukunambitha umdlalo womncintiswano kuFC Platinum njalo umdlalo lo yiwo ozamdonsela amehlo, kudingisiswa ukuthi ungumqeqetshi olamacebo anjani.
Okungasiza iBosso yikuthi umqeqetshi wezimbamgodi uNorman Mapeza utshele intatheli ngoLwesibili ukuthi uzaphumuza abadlali abathile.
Umqeqetshi weBosso unikezwa ithuba lokugcwalisa isifiso sabalandeli bethimu asebezwakala bengajabuli ngokudlala kweqembu labo.
