uMthunywa
Ethel Ncube
KULENDODA yeNsuza eMathabiswana esele ilezikhewu ngemva kokuba ibanjwe xhaka ilejazi lomkhwenyana elisebenzileyo esikhwameni sebhulugwe ngumkayo.
Isindabaphenduli le yenzakale ngoMvulo kuyonale iviki lapho uMnumzana Norman Moyo ebanjwe ngumkakhe uNosizwe Moyo elekhondomu elisebenzileyo esikhwameni.
UMthunywa uxhumane loMnumzana John Ndlela oveze ukuba udaba olunjalo uyalwazi.
“Mina ngabona uMoyo evuvuke umlomo ngathi ngimbuza wathi uthe ebeka ibhulugwe ayeligqokile kwakhithika ijazi lomkhwenyana. Umfazi wahle wazonda wagana unwabu wathula wekela indoda yahlala phansi wagqoka oqwa bakhe kuhle wafika wakhahlela indoda wavubana layo kubangwa lelo khondomu.
“Ngesikhathi kuliwa uMnu Moyo uthi yena kazange abisele umkakhe ngoba inkonyane isiwuchithile umuthi,” kubika uMnu Ndlela.
Uqhubekele phambili echaza ukuthi udaba lolu lwenza uMnu Moyo wasala engelamazinyo aphambili.
“UMoyo amazinyo amabili ahle aphuma ngokukhahlelwa ngoqwa. Ngokubikelwa kwami umfazi lo waziphosa izibhakela endodeni okuzwayo efuna ukuzwa ukuba indoda ibilisebenzisa lobani lelo jazi lomkhwenyana,” kubika uMnu Ndlela
Ekhuluma lentatheli uNkosikazi Nosizwe Moyo uchaze ukuba kuliqiniso ukuba umkakhe ukhumuke amazinyo.
“Othe ngakhupha indoda yami amazinyo ngubani? Wakhitshwa yibutshapha bakhe. Kulendoda engathi iqeda ukulala lomunye umfazi ithwale ikhondomu, yikudelela lokhu. Mina vele angilandoda sihlobo sami ngiyatshaya, angidlali. Ngifuna ukuya eZambia ngiyedinga ikhiye yesitho ngithule umsindo kuphela,” kutsho uNkkz Moyo.
UMthunywa ubuye waxhumana loMnumzana Moyo owatholakala elekhondomu ovumileyo ukuba laphuma kuye.
“Kuliqiniso sibili ukuthi ijazi lomkhwenyana lakhithika empahleni zami kangali kodwa ayisimi engangilifake esikhwameni, ukuthi langena njani lami angazi, ngamangala selikhithika kimi. Ngathi ngibikela umkami wala ukuzwisisa udaba lwami ngezwa ngesicathulo emlonyeni,” kuphetha uMnu Moyo.
