uMthunywa
YiNtatheli kaMthunywa
ISELE ingasela zinyo enye indoda yesigabeni seTshokotshoko eBeitbridge ngemva kokunankwa ngumakhelwane wayo ngoba ebophe ubabhemi wakhe engamnikanga imvumo.
Linkemenkeme yendaba yenzakale ngeviki ephelileyo lapho uMnumzana Petros Dube atshaye khona uMnumzana Philani Ndlovu wamkhipha izinyo kubangwa ukuthi kungani uNdlovu ebophe ubabhemi kaDube yena engakwazi.
Ekhuluma lephephandaba likazulu uMnumzana Sifelani Mdlongwa owayekhona laba ababili benamathelana uthe babedakiwe okuyikho okwenza bathi bengomakhelwane babange into encane kangako.
“Abantu laba bebedakiwe bonke, besinatha labo ezitolo nje uDube wabuza uNdlovu ukuthi ubebophelani ubabhemi wakhe engamnikanga imvumo yakhe,” kuchaza uMnu Mdlongwa.
“UNdlovu walile ukuthi ubembophile kodwa abantu bambona embophile ngelanga uDube emdinga, ngibona lokho yikho okusuke kwazondisa uDube ukuthi uNdlovu uphika into ayenzileyo,” kuqhuba uMnu Mdlongwa.
UMnumzana Polite Moyo laye owayekhona isiga lesi sisenzakala uthe bamangala ukuthi umuntu sengaze akhitshwe izinyo kubangwa ubabhemi nje.
“Le yinto obekumele ukuthi ngabe abantu bayahlala bakhulumisane kuhle njengabomakhelwane kulokuthi balwe, uDube unjalo, vele anganatha uyathanda ukulwa kakhulu kulokuthi alungise izinto ngokuthula,” kutsho uMnu Moyo.
“UNdlovu ubabhemi umbophile sibili, inengi labantu liyakwenza vele lokhu okokubopha obabhemi babanye abantu nxa ababo bengeneli, kodwa bekumele amcele kuDube ukuthi bangacini besilwa njengalokhu okucine kusenzakala,” kuqhuba uMnu Moyo.
UMnu Ndlovu ebuzwa ngodaba lolu uthe lwenzakele sibili kodwa sebekhulumisene lomakhelwane wakhe.
“Yebo, silwile sibili loNdlovu kodwa ukuthi besibangani uzatshelwa nguyenalo umuntu okutshele indaba leyo, mina lomakhelwane wami sesikhulumisene, akusela hlupho,” kuphetha uMnu Ndlovu.
