uMthunywa
Nkosilathi Sibanda
ABADLALI beqembu lenguqu iHow Mine asebekhulile kubikwa sebehlalele evalweni ngemva kokuzwa ukuthi sebezaqeqetshwa nguKelvin Kaindu kusukela ngesizini ezayo.
IHow Mine kulisizini ibidlalelwa ngabadlali esebadlala inguqu okwesikhathi eside, okuyikho okwenze lithimu yachothozwa ukuthi igcwele abadlali “abadala’’ bodwa.
Owayengumqeqetshi walithimu uLuke Masomere wakhetha abadlali abaleminyaka ephezulu yokuzalwa ejonge ukuthi aphakamise ithimu kodwa kwehlula.
Inengi labadlali beHow Mine lileminyaka yokuzalwa edlula amatshumi amabili lanhlanu.
Kuyaziwa ukuthi uKaindu uthanda ukudlalisa ithalenta elisakhulayo, ngakho ukuza kwakhe kuHow Mine kuzadala inkalakatha yomehluko kulithimu.
Loba abadlali abangahle bavalelise iHow Mine bebanengi, kuzwakale ukuthi abalakho ukuthi baxotshwe nguKaindu bagoqela uTawanda Muparati, uMernad Mupera, uTapuwa Khumbuyani loThembani Masuku.
Omunye umfakazi osebenza leqembu leli ubike ukuthi uKaindu ngoMvulo uchaze ukuthi ufuna ukuqala ithimu phansi.
“UKaindu ubuya labasekeli bakhe njalo kafihlanga ukuthi iqembu kumele limncedise ukuthi abumbe ithimu ezasuthisa izifiso zakhe kanye lezenkampani yeHow Mine.
“Bekulomhlangano ngoMvulo emahofisini eHow Mine lapho uKaindu abeke izikhalazo zakhe kanye lokwelula uhlelo lwakhe lokusebenza.
Ubike ukuthi ucela usekelo olugcweleyo nxa esedinga abadlali abathile, waphinda wacela ukuthi akhethe abasekeli bakhe. Amabizo abadlali abangasoke babekhona ngesizini ezayo ayedlula itshumi. Lokho kutsho ukuba umqeqetshi omutsha lo uzaqalisa ithimu ngabadlali abatsha,” kutsho umfakazi ophezulu kuHow Mine, owesabe ukuqanjwa ngoba ethi engaxotshwa emsebenzini.
Iphephandaba likazulu lizame ukuxhumana loPaul McAndrew umgcinisihlalo weHow Mine kodwa akazange abambe ucingo.
Amanye amalunga equla le-executive alile ukukhuluma loMthunywa ngaloludaba, abika ukuthi umgcinisihlalo nguye olemvumo yokukhipha imbiko.
