uMthunywa
Nkosilathi Sibanda
KUSUKELA ngomnyaka ka2010, iZimbabwe ayikaze idliwe yiMalawi kumdlalo wenguqu.
Imbali yokungqikilana kwamazwe la iveze ukuthi iMalawi ihlala ithwele nzima ukuthi igenqule amaWarriors akuleli.
Amazwe womabili azahlangana njalo esigodlweni ngeSonto kumdlalo wokukhankasela ukuyadlala kuAfcon ka2017.
Umqeqetshi wesizwe uCallisto Pasuwa ulakho ukuthi athole inhlonipho nxa enganqoba kulumdlalo ngoba amaWarriors adinga ukungena kulomncintiswano okwesithathu.
UPasuwa usekhethile abadlali afisa ukuyabadlalisa ngeSonto. NgoLwesibili amaWarriors adlale okobungane lesizwe seUganda enelisa ukunqoba 2-0 enkundleni yeRufaro.
Umqeqetshi lo ubefuna ukuthi umdlalo ubeseNational Sports kodwa iZifa yenze intando yayo yabika ukuthi kudlalelwe eRufaro.
Ngokuzwa kwabafakazi abaseduzane leqembu, kubikwa abadlali bawumelele ngamehlo abomvu umdlalo lo.
Ingalane yalumkhankaso iZimbabwe iphezulu ngemiklomelo eyisitshiyagalombili, kulandele iGuinea leSwaziland ezilemiklomelo emihlanu zombili. IMalawi ibambe emsileni ngemiklomelo emibili kuphela.
Kulumdlalo, umqeqetshi uPasuwa unikezwa ithuba lokuthi alolonge ithimu ezangena kumncintiswano weAfcon okwesithathu.
Kuhlandla lakuqala, iZimbabwe yanqoba 2-1 egumeni leMalawi kodwa izazi zenguqu zibika ukuthi akusoze kwabalula ukuthi amaWarriors anqobe ngoba iMalawi ilembali yokuvuka ngesikhathi ingacatshangelwa.
Komunye umdlalo weAfcon kuqula leli, iSwaziland izadibana leGuinea edolobheni leMbabane.
IZimbabwe ingenelisa ukuthola indawo kuma-final eAfcon nxa inganqoba iMalawi okuzwayo, njalo ukunqoba kwamaWarriors kuzamele kuncediswe yikuthi iSwaziland leGuinea ziqede zingutshiki lobhanqa kungela ehlohlileyo.
Nxa iSwaziland inganqoba, iZimbabwe kuyabe kumele ihlohle amabhola amanengi, kodwa uvalo lungabakhona ngokunqoba kweGuinea ngoba yiyo ephambili.
AmaWarriors abhekane lomncintiswano emibili, oweAfcon loweCosafa. Umqeqetshi usebize abadlali abafika
Nampa abadlali abakhangelelwe ukuthi bafikise iZimbabwe kuAfcon:
Onozinti: Tatenda Mukuruva (Dynamos), Donovan Bernard (How Mine), Tapiwa Chilenga (Triangle)
Imvimbi: Costa Nhamoinesu (Praha FC, Czech Republic), Lawrence Mhlanga (Chicken Inn), Hardlife Zvirekwi (Caps United), Bruce Kangwa (Highlanders), Onesimo Bhasera (Bidvest, SA), Elisha Muroiwa (Dynamos), Teenage Hadebe (Chicken Inn), Blessing Moyo (Harare City)
Abadlali abasesiswini: Willard Katsande (Kaizer Chiefs, SA), Marvellous Nakamba (Vitesse, Netherlands), Danny Phiri (Chicken Inn), Kuda Mahachi (Golden Arrows, SA), Marshall Mudehwe (FC Platinum), Farai Madanhanga( Harare City), Tafadzwa Kutinyu (Chicken Inn,) Andrew Gwaze (Gornik Zabrze, Poland),
Abagadli: Tendai Ndoro (Orlando Pirates), Knowledge Musona (Ostende, Belgium), Nyasha Mushekwi (Daliyan Yifang, China), Evans Rusike (Maritzburg, SA), Mathew Rusike (Helsingbord, Sweden), Khama Billiart (Mamelodi Sundowns, SA), Cuthbert Malajila( Mamelodi Sundowns, SA)
