uMthunywa
YiNtatheli kaMthunywa
SESIFIKILE kusigaba somnyaka lapho udaba olusegudwini kwezenguqu ngolokuthengwa lokuthengiswa kwabadlali.
Abanye abadlali ngabaqeda isizini bengelamuntu ongabathengisa kuthi abanye ngabayimhambuma bencenga ukuhlala kuloba yiphi ithimu.
Kuliviki sidingisise ngabadlali laba, ikakhulu kumathimu angezansi yelizwe.
Sivule indlebe sacubungulisisa imbiko yamahungahunga agcwele kunguqu yethu.
Ake sihlolisise ukuthi ngobani okukhanya sebeluqalile uhambo lokulungiselela isizini ka2016 kanye lemqhugelwano yeCaf Confederations Cup leye-Champions league.
Chicken Inn:
Iqembu lamaGamecocks yizo intshantshu zenkezo yeCastle yalisizini. Yebo ithimu le ingabe igcwele abadlali abanengi abalethalenta kodwa kumele iyengezelele. Leli yilo iqembu elizakuya kumincintiswano ye-Champions League.
IChicken Inn izadlala leMamelodi Sundowns kumdlalo wokuqala kuCaf Champions League.
Umgcinisihlalo wethimu le uLifa Ncube watsho kumaviki adluleyo ukuthi kabasoze bazihluphe ngokuthenga abadlali. Lakanye kuthiwa sebebophe isinqumo sokuthi abakhiphi imali.
UNcube uthe abalandeli benguqu kumele babekwazi umqeqetshi wabo uJoey Antipas akayindawo.
Isivumelwano sikaAntipas leChicken Inn siphela ngqe ngelanga lokucina kuMpalakazi ka2016.
Isikhona imbiko ezula ngokuthi umqeqetshi kuzwa weligi yeCastle PSL 2015 lo usefuna ukutshiya ithimu le. Imbiko le kubikwa iyize ngoba ikomithi ekhokhela leliqembu isithembise uAntipas esinye isivumelwano esedlula isizini eyodwa.
Nxa kunjalo kutsho ukuthi amathimu akuligi yePSL kuzamele abophe ziqine nxa efuna ukunqoba iChicken Inn.
Highlanders FC
Lezi zintshantshu zenkezo yeEasycall. Ngokuzwa ngabafakazi abaqotho, kubikwa ziyabheda kuMantengwane.
Kuhamba uKnox Mutizwa osevumelane leBidvest Wits yaseSouth Africa. UObidiah Tarumbwa loTeenage Hadebe labo ngabanye ababalelwa kubadlali abangehlukana leqembu.
Abaqeqetshi uAmini Soma Phiri lomkhulu wakhe uCosmas ‘‘Tsano’’ Zulu sekwaziwa ukuthi abasoke baqhubekele phambili ngomsebenzi.
Ithimu le ifuna ukudinga umqeqetshi ongumlungu okuzwakale ukuthi nguErol Akbal.
UDumaza Dube, ingcitshi yokuqeqetsha abadlali abasakhulayo kubikwa engaphenduka ukuzoncedisa iqembu elikhulu.
Udletshana esilalo kuliviki yikuthi umaqhuzu uNdumiso Gumede umatasatasa ngokukhuluma labafana mayelana lama-contract.
Zinengi ingcitshi zabadlali ezifisa ukungena kwezikamagebhula kodwa zisathulisele.
Bulawayo City
Abafana laba bachinsa ukudlala kunkundla zePSL.
Umgcinisihlalo walithimu uJerry Sibanda uthi kasoke athenge ngitsho lomdlali oyedwa kodwa uMthunywa uzwe okunye.
“Simelele ukukhangela abadlali abangela ma-contract lamaqembu,” kutsho uSibanda.
Mhlawumbe sikhuluma ngemva kwendaba. Okusegudwini yikuthi Amakhosi okwamanje asevumelane labadlali abalitshumi lasitshiya galolunye.
Utshintsho olungabakhona yikudingwa komqeqetshi ozaphatha isikhundla sokuba ngumqondisi wenhlelo zokulolongwa kweqembu.
FC Platinum
Lapha njengakho sizakhuluma siqede iphephandaba. Ithimu le ifuna ukubutha njalo abadlali.
Azipheli ezePlatinum. Le yithimu okucatshangelwa ukuthi ilemali ukwedlula wonke kunguqu yeZimbabwe.
Isikhulumi sayo uChipo Chizondo uthe abalandeli abame kancane semukele u2016 anduba kuvele ukuthi ngobani abathengiweyo.
Iyaqhubeka eyamahungahunga okuthengwa lokuthengiswa kwabadlali kuviki ezayo.
