uMthunywa
YiNtatheli kaMthunywa
ZITSHE amathe izakhamizi zesiqintini seMaqaqeni esigabeni sakoSigola budebuduze ledolobho lakoBulawayo ngemva kokukhitshwa kukandofa ole-rasta okubikwa ubesehluphile ngokuya emacansini labafazi babantu.
Isiga lesi senzakale kuviki ephelileyo lapho abaphurofethi akade benxuswe ukuzohlanza isigaba lesi abakhiphe undofa ophenduke waba luphondo emzini wesinye isakhamuzi.
UMthunywa uxhumane loNkosazana Minenhle Ndebele ochaze ukuthi laye wayekhona mhla kukhitshwa undofa lo njalo kalamathe.
“Mina ngangikhona kukhitshwa undofa lo koMaSibanda njalo angilamathe ngengakubonayo. Abaphurofethi batshudulana laye bebane besehluleka ukumbamba kwaze kwabuya owesihlanu kwayikhona bembamba,” kutsho uNkszn Ndebele.
Uqhubekele phambili njalo walandisa ukuba noma nje bengasachazanga kuhle ukuthi undofa ngokabani kodwa kwakukhanya ukuba ukhona omaziyo kulowomuzi.
“Noma nje abaphurofethi laba bengasachazanga kuhle ukuba undofa lo ngokabani kodwa kwakukhanya ukuba engaba ngowalapha ekhaya ngoba watholakala efihlwe esikhwameni esasingaphansi kwesivalo laso esasingaphansi kombheda.
“Bathi undofa lo ubelala labesifazana ebusuku abuye njalo atshontshe ukudla emizini yabantu ayenika umnikazi.
Okungimangalisayo yikuthi uMaSibanda wehluleka njani ukubona isikhwama esingakaya ngaphansi kombheda wakhe esasigcine undofa lo,” kuchaza uNkszn Ndebele.
Ekhuluma lentatheli umzukulu kaNkszn Sibanda, uLiberty Moyo uchaze ukuthi laye wambona undofa lo kodwa ulensolo ngaye njalo kasowangakibo.
“Lami ngambona undofa lo kodwa ngabona sokuluphondo olulenwele ezinkulu eziphothiweyo. Abaphurofethi laba bathi belukhupha uphondo lolu baluphosela emgqomeni olamanzi bahamba lalo bafika balutshisa eziko lapho abahlahla khona.
“Sathi sibuza ukuthi kungani bengalutshengisi abantu bonke bathi luyingozi ngoba lungatshayisa abantu ngezulu njengoba lalithwele. Lathi sathula noma nje kwakusisolisa,” kutsho uMnu Moyo.
UNkosazana Rosemary Sibanda okunguye okhitshelwe undofa lo ubikele intatheli ukuthi ulesithuli ngondofa lo ngoba wayengamazi.
“Kuliqiniso sibili ukuthi abaphurofethi babuya bazokhipha undofa emzini wami kodwa mina kasowami njalo ngangingakwazi ukuthi kulondofa emzini wami,” kutsho uNkszn Sibanda.
Uqhubekele phambili njalo walandisa ukuba abaphurofethi laba bathi undofa lo ubefuna ukumbulalela umntanakhe njalo laye uyake azwe nxa elele ukuba kukhona okukhona emzini wakhe.
“Abaphurofethi bangitshela bathi undofa lo ubefuna ukungibulalela umntanami. Babuya njalo bathi undofa lo kasowami wagciniswa ngumakhelwane ngakho bengangitshela ukuba ngubani sizacina sisilwa.
“Okunye njalo undofa lo kungabe kuliqiniso ukuba ubegcinisiwe emzini wami ngoba ngangithi nxa ngilele ngiphuphe ngilele lowesilisa ngaze ngayabuza kumakhelwane wami laye wathi kuyamenza. Kodwa ngemva kokukhitshwa kukandofa lo angizake ngikuzwe lokhu, okutshengisa ukuthi undofa lo ubengigangela sibili,” kuphetha uNkszn Sibanda.
