uMthunywa
YiNtatheli kaMthunywa
ZILOKHE zingelankani izakhamizi zakoSogwala eLower Gwelo kulandela ukuvumbuluka kokhakhayi, amathambo kanye lempahla zexhegu elanyamalala kuminyaka eyisithupha edluleyo kwelinye idamu ehlohlelwe phakathi komgodla, uMthunywa uyakuveza lokhu lamhlanje.
Indabamlonyeni le njalo eyimpicabadala yenzakale ekuqaleni kwayonale inyanga esigabeni senduna uSogwala.
Izakhamizi zakule indawo ezenza i-food for work zilokhu zitheneke amadolo kulandela ukuhlangana lokhakhayi kanye lamathambo phakathi komgodla ngesikhathi ziphanda idamu leMangorongondo eliduzane lesikolo seWhata Secondary.
Umuyi uDokotela Nkiwane kubikwa wanyamalala eminyakeni eyisithupha edluleyo lapho asuka khona esigabeni sakibo koSogwala esiyavakatshela abafowabo emapulazini aphetsheya kukaTshangane.
Kucatshangelwa ukuba kungabe kulomuntu owabulala uNkiwane wasemgcina esiphaleni andubana ayephosela ukhakhayi kanye lamathambo phakathi edamu nanko phela impahla asuka ezigqokile zilokhe zingakaboli yikho nje benelise ukubona ukuthi ngezakhe.
Kubikwa emgodleni lo bekulokhakhayi, amathambo, ibhatshi kanye lezicathulo.
Intatheli kaMthunywa ibikelwe ukuthi ngemva kokunyamalala kukaNkiwane imizamo yokumdinga yenziwa kodwa akazange abonakale.
UMnumzana Jabulani Nkiwane ongumtanomfowabo kamuyi uchazele iphephandaba ukuthi izicathulo ezatholakala lapha kanye lebhatshi bekuyizo xathu ezikayise omdala.
“Impahla ezatholakala lapho yizo kanye ezikababa. Labantu ababuya lapha bezobona abesigabeni bachaze ukuthi ngempela yizo ezikababa.
“Ngemva kokuthi ubaba esenyamalele sazama ukumdinga kodwa kwabanzima ukumthola. Abantu bathatha isikhathi eside bemdinga baze badela.
“Okwenza abantu bangazihluphi kakhulu ngokuthi engabe wafa yikuthi ubengumuntu othanda ukuhamba anyamalale aze aphenduke ngemva kwesikhathi eside,” kutsho uMnu Nkiwane.
Ubuye njalo wathi bafisa ukuthi amapholisa achwayisise ngesenzo lesi ukuze bazi ukuthi ngubani owenza isihluku esingaka sokubulala uyise.
Kubikwa ngemva kokutholakala kwempahla lezi kwabikelwa amapholisa ayiwo asebenza loludaba lokuchwayisisa ukuthi kuyini okungabe kwabulala uNkiwane lokuthi ngubani owamphosela phakathi kwedamu leli.
Esinye isakhamuzi sakule indawo uNkosikazi Yvonne Nkomo sichaze ukuthi kungabe kukhona okutshaya amanzi.
“Abantu bagangile sibili. Mhlawumbe umuntu wambulala wathatha izitho zexhegu lenkosi. Kodwa noma kunjalo kuzavela kuphela njalo sifisa ukuthi umthakathi lo abotshwe aphinde ajeziswe.
Esinye njalo isihlobo esiseduze lomuyi esithande ukwaziwa nje ngokuthi nguMaNkiwane sichaze ukuthi bethuka sebesizwa kuthiwa kulamathambo avunjululwe edamu acatshangelwa ukuthi ngakayise omdala.
“Thina sezwa sesibizwa kuthiwa siyefika edamu kuvunjululwe amathambo. Sathi sifika lapho sathola izicathulo zikababa omdala lebhatshi lakhe kuhlangene emgodleni lamathambo,” kuchaza uNkszn Nkiwane.
Uqhubekele phambili esithi lokhu bengelankani ngesiga lesi.
Kubikwa amapholisa abikelwa ngodaba lolu.
Imizamo yokukhulumisana lesikhulumi samapholisa esabelweni seNkabazwe yehlule ngoba ucingo belungadojwa.
Ngokufanayo imizamo yokukhuluma lenduna yakule indawo uSogwala yehlule ngoba ucingo belungadojwa kwaze kwafika isikhathi sokudindwa kwephephandaba.
