uMthunywa
YiNtatheli kaMthunywa
Kulamasotsha amathathu okubikwa abhaxabule omunye ukhondekitha webhasi yakoGreen Horse kabuhlungu ngemva kokulahleka kwempahla zabo kule ibhasi.
UAmos Mwembe (33) wePlumtree, uDanisa Munkombwe (31) kanye loNomatter Mwembe abahlala eHwange batshaya uGaster Mudenda kabuhlungu wavuvuka umzimba wonke ngethuba bebona ukuba impahla zabo kazisekho ebhasini okwadala ukuthi izigangi lezi zibotshiswe.
Umthethwandaba weHwange uzwe ukuba uAmos Mwimbe labangane bakhe uDanisa Munkombwe kanye loNomatter Mwembe babegade ibhasi besuka eHwange besiya eBinga bathi sebesehla eKamativi uMudenda watshela uAmos ukuthi impahla zabo kasaziboni okwadala ukuthi abangane bakhe badobhe amatshe bamtshaye ngawo bethi bafuna impahla zabo.
Kubikwa uMudenda waze wasizwa ngabantu ababephakathi kwale ibhasi okuyibo abamlamulelayo ekutshayweni lokhu noma nje wayeselimele ekhanda kanye lemzimbeni.
UAmos ugwetshwe inyanga ezine kwasekusephulwa ezintathu kwasala eyodwa layo yephulwa wasehlawuliswa imali engange $100.
UMunkombwe laye ugwetshwe inyanga ezintathu zaseziguqulwa zisiba ngamahola angu-105 okufanele awasebenze ekilinika yePashu kwathi inyanga ezimbili zaguqulwa kwathiwa ahlawule imali engange $50.
Kubikwa uNomatter laye wagwetshwa inyanga ezintathu ezaguqulwa kwathi amahola angu-105 aba ngowokusebenza ekilinika ye No 1 kwasekusithi inyanga ezimbili ezasalayo zaguqulwa njalo wasehlawuliswa imali engange $50.
UMantshi kulelicala bekunguNkosazana Sheron Rosemani.
