uMthunywa
NGENHLOSO yokulimukisa uzulu ukuthi azi ngobubi bezidakamizwa amapholisa akoBulawayo angene ezitaladeni zakuleli dolobho kumkhakaso wokuqeda ukusetshenziswa kwezidakamizwa.
Amapholisa afundise uzulu ngobubi bezidakamizwa baphinda bafundisa ngokuthi umuntu othatha izidakamizwa umbona ngaziphi izitshengiselo.
Isikhulumi samapholisa uInspector Abednico Ncube ubikele izakhamizi ukuthi bonke abathengisela abantu izidakamizwa kumele babotshwe ngoba babulala umphakathi kancane kancane.
“Kulendaba yabantwana abangu-17 beNtumbane abasesibhedlela sabaphethwe ngumkhuhlane wengqondo kubangelwa yikuthatha izidakamizwa. Okubi ngokusebenzisa izidakamizwa yikuthi ngaphandle kokubulala lo ozithathayo kunika izigaba ibizo elibi.
“Nxa indawo isilebizo elibi kuba nzima ukuthi abantu baqhatshe kumbe bethembe abantu abasuka kiso. “Umntwana usengaphumelela kuhle ezifundweni ethi esedinga umsebenzi athi uvela eNtumbane bahle besabe ukumqhatsha,” kutsho uInsp Ncube.
U-Inspector Abednico Ncube
Uthe umuntu onatha injengu umbona ngokucaka ikhanda liphinde libe likhulu, umbona njalo ngejwabu eligugileyo, yena ngeminyaka esasemncane. Ababhema iskunk kumbe imbanje ubabona ngokudla kakhulu.
Uphethe ngokuthi abantwana besikolo kumele bathi bangazi ngomuntu othengisa izidakamizwa baphangise babikele amapholisa.
“Abantu laba kumele bamangalelwe emapholiseni njalo kulamagroup ambalwa esewavulayo kunkundla zokuxhumana lapho abantu abangabalakho ukubikela amapholisa ngabantu abathengisa izidakamizwa. Ekhuluma loMthunywa okhethe ukubizwa ngelokuthi Mnunzana Ndlovu nje kuphela oyisakhumuzi seNtumbane uthe ukuthengiswa kwezidakamizwa kuyinto emziswa ubuhlungu kakhulu nanko phela ulendodana esiphatheka kikho.
“Indaba yezidakamizwa mina isingihlukuluze kakhulu ngoba umntanami uyazinatha afike endlini ebusuku asihluphe. Useze watshiya lesikolo, sengizame konke lokubikela amapholisa kodwa abambophi. Kungakho-ke ngikubona kumqoka ukuthi bonke abathengisa izidakamizwa babotshiswe,” utsho njalo.
