uMthunywa
YiNtatheli kaMthunywa
KUBE yisisanasana ubukhwa bezinja esigabeni seMasuswini, eLupane ngemva kokuba amanye amanina esithenjini egiqane phansi ebanga ulimi lwenkomo.
Impi le yenzakale kuviki ephelileyo lapho uNkosazana Sanelisiwe Mafu (52) avoxwe khona nguNkosazana Thembelihle Ngwenya (25) ethi kungani edle ulimi lwenkomo wamncitsha.
Kubikwa amanina la athethwe nguMnumzana Gilbert Sibanda okucatshangelwa ukuthi nguye othi uNkszn Ngwenya atshaye unyanewabo.
UMthunywa uxhumane loNkosazana Linet Moyo oyisakhamuzi sakule indawo wachaza ngendaba le ethi ababili laba bahlala bexabana.
“Mina ngathi ngivela emasimini ngezwa umsindo komakhelwane ngagijima ngaya khona. Ngathi ngifika ngathola uNkszn Ngwenya etshaya unyanewabo eseze wamdabulela isiketi ayesigqokile wamnyelisa lengalo.
“Ngathi ngibabuza ukuthi babangani uNkkz Mafu wathi umtshayela ukuthi kungani emncitshe ulimi lwenkomo yakhe efele ejogweni. Ngalesosikhathi ngamkhuza uMaNgwenya ngamtshela ukuthi engabotshaya unyanewabo ngasengithatha uMafu ngamusa ekilinika,” kuchaza uNkszn Moyo.
Ebuzwa ngale indaba uNkszn Ngwenya uvumile ukuthi yenzakala wathi unyanewabo uhlala emthethisa yikho wamtshaya.
“Kuliqiniso sibili ukuthi ngaxabana lonyanewethu sibanga inyama yenhloko kodwa mina okwenza ngamtshaya yikuthi kangihloniphi, uhlala engithethisa ethi kangiphume emzini wakhe esehluleka ukuthi akhulume lomkami.
“Ngokunjalo angaze angibophise ngizamtshaya sibili engaqhubeka engidelela ngoba lami ngingumfazi njengaye,” kutsho uNkszn Ngwenya.
UNkkz Mafu uthe yena uzwa ubuhlungu ngoba unyanewabo usemchithela umuzi njalo uhlala emtshaya engelacala.
“Ngizwa ubuhlungu kakhulu ngoba unyanewethu uhlala engitshaya ethi sengikhule kakhulu sekufanele ngife khonapho engumntwana omncane njalo wangithola emzini wami lomkami. Okunye njalo umuzi wami suchitheka ngoba umkami kasanginaki, senanza yena kuphela. Mina sengincedwa ngabantwabami,” kuveza uNkkz Mafu.
UMnu Sibanda ebuzwa ngale indaba uthe yena kakungeni ukuxabana kwabomkakhe njalo ulemvumo yokuthatha isithembo.
“Mina kangikungeni ukuxabana kwabomkami ngoba kangikwazi abayabe bekubanga. Okunye futhi ngilemvumo yokuthatha isithembo ngakho ongafuniyo ukwendela esithenjini ukhululekile ukuthi atshiye,” kuphetha uMnu Sibanda.
