uMthunywa
Nomthandazo Ndlovu
ZIBABAZA zingaqedi izakhamizi zelokitshini leMandava eZvishavane ngenxa yamajaha abhuqe intombi yawo qede ayithela ibilebile esithweni sayo sangasese.
Lesi siga esitshiye izakhamizi zicobeke amadolo senzakale kumaviki amabili edluleyo lapho amajaha okutholakale ukuthi nguPolite loTariro abangomakorokoza abafake uNkosazana Pamela Masera ibilebile ngenxa yokuthi ubethandana labo bobabili.
Ekhuluma loMthunywa uMnumzana Brian Takawira owayekhona uMasera ethutsha sehlaba umkhosi esithi abantu bafuna ukumbulala uthe:
“Thina besinatha ebhawa unkazana lo laye wayenatha lapho, ukuphuma kwakhe angizange ngimbone kodwa kuthwa waphuma loPolite baya phandle lapho okwakulo Tariro khona.
“Okwenzakala phandle lapho asikwazi kodwa uPamela wathutsha ebhawa egijima ekhala izigqoko zakhe sezidabukile ebambe ngaphansi okutshengisa ukuthi wayesizwa ubuhlungu,” kuchaza uMnu Takawira.
Kubikwa uMasera wancediswa ngabangane bakhe ayenatha labo bona abamthatha bamhambisa endlini.
“Abangane bakhe bacela amanzi ebhawa bamgezisa kodwa indlela ayejanquka ngayo ngenxa yobuhlungu izwisa usizi. Yena uvele uthanda amadoda unkazana lo yikho mhlawumbe bemfake ibilebile,” kutsho omunye ufakazi othande ukwaziwa ngokuthi ngu Brian.
“Abafana laba khathesi asikwazi ukuthi bangaphi lokhu benza isiga sabo lesi asikababoni, kodwa unkazana yena sepholile ngoba ngike ngambona enatha futhi ebhawa,” kuchaza uBrian.
Imizamo yokukhulumisana lalaba abathathu yehlule ngoba inombolo zabo zocingo azitholakalanga.