uMthunywa
YiNtatheli kaMthunywa
UKUNGENA kwezamabhizimusi kuyathuthukisa umuntu ngamandla nanko phela umama wesizwe wakuleli ungomunye wabazithuthukisayo njalo asebethole indondo kwezamabhizimusi.
Umama uDokotela Grace Mugabe waqalisa ezamabhizimusi ngesikhathi esafuya inkukhu kwathi ngomnyaka ka2015 kusele amaviki amabili ukuthi athakazelele usuku lwakhe lokuzalwa esiba leminyaka engu-51 wathola indondo kwezamabhizimusi.
NgoMgqibelo kuyonale iviki kuzabe kuthakazelelwa usuku lukamama wesizwe lokuzalwa lapho azabe ethakazelela iminyaka engu-52.
Ekhuluma lentatheli ngo2015 uDkt Mugabe ngemva kokuthola isicoco kwezamabhizimusi wathi uyajabula kakhulu ngesicoco sakhe ngoba siveza ukuthi umsebenzi wakhe uyancomeka.
“Mina ngiyajabula kakhulu ngokuthola indondo kuZimbabwe National Chamber of Commerce ngoba kutshengisa ukuthi ilizwe liyathuthuka. Indondo le ngiyithole ngenxa yokuthuthuka kwesikolo sami i-Amai Mugabe Junior School kanye lokuphakama kweGushungo Dairy Farm,” kutsho uDkt Mugabe.
Kubikwa iGushungo Dairy Farm yiyo eyenza ama-yoghurt, ama-ice cream kanye lokunye ukudla okwenziwa ngochago, okuyinkampani ekusibanga sesibili ubukhulu emazweni wonke eSouthern Africa.
Kukanti njalo isikolo sakhe iAmai Mugabe Junior School yiso esikhulu kuleli nanko phela sithatha abafundi abangu-1 000 ngomnyaka.
UDkt Mugabe wabuya wathi ukufuya wakuqalisa ngesikhathi esafunda lapho ayefuya khona inkukhu njalo ethunga.
“Mina ngaqalisa ukufuya ngesikhathi ngisafunda ngikithi eChikomba lapho engangifuya khona inkukhu zemakhaya.
Ekufuyeni kwami lapha ngangizithengisa ngibuye ngithenge ezinye ngizifuye. Inkukhu lezi zangithuthukisa kakhulu ngoba mina kangidli inkukhu ngakho kwaba lula ukuthi zande. Ngathi sengisebenza ehofisini kaHulumende ngasengithunga ngibuye njalo ngithengise impahla emakethe. Ngikhuluma nje lakhathesi ngiyakwazi ukuthunga.
“Kuthe ngesikhathi ngileminyaka engu-19 ubaba wami wabhubha ngakho kangisatholanga ithuba lokwenza i-degree ngaze ngayalenza eChina eleChinese Language ePeople’s University ngaliqeda ngomnyaka ka 2011,” kutsho uDkt Mugabe.
UMama uMugabe khathesi unguDokotela ngemva kokwenza iDoctor of Philosophy degree e-University of Zimbabwe.
Umzukulu kamama uDkt Mugabe uNkosikazi Farai Chinyani ubikele iHarare Bureau ukuthi umama wake waba liloja njalo wayehlala endlini eyodwa ngesikhathi esakhula.
“UMama uDkt Mugabe wake waloja indlu eyodwa ngesikhathi esakhula kodwa ngenxa yokuzehlisa kwakhe waphakama, khathesi nanku usehlala eState House. Ngokunjalo mina ngiyambonga kakhulu ngoba wangifundisa ngaze ngayafika ekolitshini.
“Ukufundisa lokhu wakwenza kuzo zonke izihlobo zakhe njalo wayengela nkethabetshabi ngoba sonke wayesiphatha ngendlela efanayo njalo enhle,” kuphetha uNkkz Chinyani.
