uMthunywa
YiNtatheli kaMthunywa
SEKUZAMELELWA isizini ezayo ukuthi iqembu leOrlando Pirates lizame inhlanhla yalo kumkhankaso wenkezo zeAfrica njalo.
Iqembu leli eliphuma eSoweto, eSouth Africa lehluleke ukuphakamisa ibizo lalo kumdlalo wokucina wenkezo yeCaf Confederations.
Iqembu leTunisia, eleEtoile duSahel linqobile labizwa intshantshu zenguqu yeAfrica kulumkhankaso ngokuqeda umdlalo nge 1-0 leBhakaniya. Abe-Etoile du Sahel banqobe ngokuthi benelisa ukuhlohla kuhlandla lakuqala lomdlalo enkundleni yeFNB kumaviki amabili adluleyo.
IOrlando Pirates yazehlisa ebukhosini mhla imisana leEtoile du Sahel eSoweto.
Lomqeqetshi wayo uErick Tinkler ubike ngokufanayo wathi iphutha lenziwe eSoweto.
“Besidonse kakuhle kodwa senza iphutha ngokwehluleka ukunqoba sisekhaya. Ukudlala besidlala nxa kumidlalo ephetsheya kodwa ekhaya besiswela inhlanhla,” kutsho uTinkler ephuma kumabonakude kaSABC kuliviki.
UTinkler ubonge ukubambana kwabadlali bakhe kulumkhankaso wathi akula ongaqanjwa ukuthi udlale ukwedlula abanye. Umqeqetshi lo uthe bonke abadlali basize okumangalisayo ukuthi iqembu lifike lesigaba senkezo.
“Siliqembu elibizwa ngebizo linye ngakho ngiyabe sengiphambanisa nxa ngibala abadlali abathile ukuthi yibo abadlale kuhle. Sonke sisebenze ngokuphelela ukuze iqembu lidlale ku-final. Kubuhlungu ukunqotshwa kodwa okumqoka yikuthi sikhangele phambili.”
Uqhubeke wabikela abalandeli ukuthi bengalahli imbeleko ngoba umango usemude phambili.
“Sesiphendukile ukudlala iligi yethu ngokupheleleyo. Akusela mncintiswano ozasiphambanisa. Nxa sifuna ukubuyela kumidlalo yeAfrica, uhambo luqala khathesi ngokunqoba kuligi,” kutsho uTinkler.
Iqembu le-Etoile du Sahel liqede umkhankaso weCaf Confederations lingakahlulwanga emidlalweni eyisitshiya galombili.
Phambi kokuba iBhakaniya liye eTunisia, umaqhuzu walo uIrvin Khoza ubecele abadlali ukuthi bamenzele okuhle ngokuza lenkezo le.
IPirates yacina ukuphakamisa inkezo yase-Africa ngesikhathi isibayintshantshu yeCaf Champions League ngo-1995.
