uMthunywa
Arnold Ndlovu
ABALIMI bakuleli bakhuthazwa ukuba balime isithelo sama-strawberry ngoba asihluphi ukulima njalo silendleko eziphansi kukanti inzuzo ekhona inengi.
Kubikwa ama-strawberry kawaphuzi ukuvuthwa kungakho abalimi bangawalima bayaphangisa ukuthola inzuzo.
UNkosazana Treggy Mpofu onguHorticulture Specialist ubikele uMthunywa ukuthi ama-strawberry alinywa kusukela ngenyanga kaNcwabakazi kusiya kuMpalakazi ngaphandle nxa umlimi ele-green house.
“Ama-strawberry afuna ilanga ukuba akhule kuhle, njalo kawadingi lomvundiso wefethalayiza, umlimi angazifakela nje umquba uyabe eseqedile.
“Amanzi lawo akumelanga abe manengi kakhulu ngoba acina engasamnandi,” kuchasisa uNkszn Mpofu.
UNkszn Mpofu uthe isithelo se-strawberry silemihlobo etshiyeneyo engadlula amatshumi kukanti avamileyo yi-chandler, pajero kanye le-sulphur. Ugcizelele ngokuthi isithelo lesi kasihluphi ngoba silinywa emhlabathini obuthakathaka (loamy soil) ongenisa umoya esilimeni kanye lokuvumela ukuhamba kwamanzi okungahluphiyo.
UNkszn Mpofu ucebise abalimi ukuthi ukuze isilimo lesi sibemnandi kumele basilime ndawonye le-garlic kanye lamatamatisi.
Uphethe ngokuthi isithelo lesi silendleko eziphansi ekusilimeni ngoba kasidingi imithi eminengi njalo siyaphangisa lokuvuthwa.
“Ama-strawberry kawafuni imithi eminengi kukanti nxa sesithengiswa silenzuzo ephezulu ngoba ngemva kwamalanga angu-75 siyabe sesivunwa sithengiswa.
“Inzunzo yesithelo se-strawberry iphezulu ngoba abathengi besithelo lesi baqala emphakathini kuze kudlulele laphandle kwelizwe okungalethela abalimi bakuleli imali yakwamanye amazwe,” kuphetha uNkszn Mpofu.
