uMthunywa
Listen Ndlovu
ABALIMI bakoBulawayo sebekhuthazwe ukuthi balime i-eggplant ngoba kuyisilimo esingatholisa umlimi inzuzo enhle.
UMnumzana Stanley Dube olepulazi eShangani uthe i-eggplant ayikhethi umhlobo womhlabathi iyavuma kuyo yonke okwenza kubelula ukuthi umlimi azilimele isilimo lesi kungakhathalekile ukuthi ukuyiphi indawo.
“Umlimi kumele aqinisekise ukuthi umhlabathi wakhe alima kuwo uyagcina amanzi ngoba umhlabathi ongagciniyo amanzi udala ukuba isilimo lesi singakhuli kuhle njalo wenza lesivuno sibe sincane.
“Indawo umlimi alima kiyo kumele ithole ilanga ukuze isilimo sikhule kuhle,” kutsho uMnu Dube.
Uthe okunye umlimi okumele akunanzelele yikuthi umhlabathi wakhe ulokudla okudingwa yisilimo lesi.
“Kuqakathekile ukuthi umlimi aqinisekise ukuthi umhlabathi wakhe ulokudla okwaneleyo ukuze isilimo sakhe sikhule kuhle.
“Isilimo lesi sisebenzisa kakhulu ifethalayiza yomhlobo we-Nitrogen yona umlimi angafaka inani elingange 168kg kuhekitha eyodwa ngoba ikhulisa isilimo, besokusithi ifethalayiza yomhlobo we-Pottassium le Phosphorus kumele afake isilinganiso se-96kg.”
“Amagodi umlimi afaka kiwo inhlanyelo yakhe kumele abe etshona nge-5cm njalo atshiyane nge-30cm kusiya ku 60cm njalo imbundu yona itshiyana nge 45cm kusiya ku 70cm. Lokho kwenzelwa ukuthi isilimo sithole ilanga elaneleyo,” kutsho uMnu Dube.
Kubikwa nxa isilimo lesi sikhula umlimi kumele akhiphe amahlamvu angaphansi ngoba adala ukubola kwesilimo nxa singathinta phansi.
“I-eggplant iyaphuza ukuvuthwa ngakho umlimi uyabe ekhuthazwa ukuthi akhiphe ukhula ensimini yakhe ukuze isilimo sikhule kuhle njalo sivikelwe lasemikhuhlaneni edalwa yibudli obugcinwa bukhula,” kuchaza uMnu Dube.
Uphethe ngokuthi nxa kungaba le-eggplant esibolile isesekunina kumele ikhitshwe ilahlwe ukuze kungaboli lezinye.
