uMthunywa
Cornelius Luphahla
IBHANGA elikhulu kuleli eleReserve Bank of Zimbabwe likhuthaza uzulu ukuthi angahlaleli evalweni ngokungena kwama-bond notes kuleli ngoba azathuthukisa umnotho wakuleli.
Lokhu kuvezwe ngezinye zeziphathamandla zalelibhanga emkhosini obuhlelwe libhanga leli lincedisana leNational University of Science and Technology (Nust) owokwazisa uzulu ngokungena kanye lokusebenza kwama-bond notes ngoMvulo eCity Hall koBulawayo.
Ekhuluma emkhosini lo umbalisi weNust uDokotela Nqobizitha Dube uthe okwabangela ukuswelakala kwemali kuleli yikuthi abantu babeyisebenzisa ngendlela engafanelanga kuthi abanye beyisa ngaphandle kwelizwe.
“Okwenza kwaba lokuswelakala kwemali kuleli yikuthi idola leMelika njengemali enkulu abantu babelisebenzisa ngokungekho emthethweni ngenxa yobukhulu balo. Abanye babelithatha besiyathenga ngalo ngaphandle kwelizwe kuthi abanye babesiyalitshintsha phandle.
“Lokhu kwadala ukuthi imali le iswelakale kuleli noma nje yayiqale ilingene ilizwe. Amankampani akuleli aqala ukuvalwa ngoba abantu bengasathengi kuleli sebethenga phetsheya ngalelidola leMelika,” kutsho uDkt Dube.
UMnumzana Khumbulani Shirichena obemele abePublic Relations bebhanga elikhulu (RBZ) uveze ukuthi ama-bond notes alande ukuzothuthukisa umnotho wakuleli ngokuthi abantu bazabe sebethenga kuleli njalo ungathengisela ngaphandle kwelizwe uyathola ibhonasi.
“Ukungena kwama-bond notes kuleli kuzathuthukisa umnotho wakuleli ngesizatho sokuthi osomabhizimusi abazathengisela ngaphandle kwelizwe bazathola ibhonasi ye5% phezulu kwemali abayabe beyithole ngaphandle kwelizwe. Lokhu kuyathuthukisa umnotho welizwe ngoba ukuthuthuka kwamabhizimusi akuleli kuletha intuthuko kuleli kwezomnotho welizwe.
“Okunye njalo amankampani akade sevaliwe ngenxa yokungathengelwa impahla zawo azavulwa ngoba abantu bazabe sebethenga kiwo njengoba ama-bond notes engasebenzi ngaphandle kwelizwe. Noma kunjalo ukungena kwama-bond notes akutsho ukuthi imali zakwamanye amazwe ezigoqela irand, ipula ledola leMelika kazisasebenzi.
Zonke lezi zizabe zisebenza njalo i-bond note liyalingana ledola leMelika,” kutsho uMnu Shirichena.
“Labo abafuna ukuyavakatshela ngaphandle kwelizwe bazabe bentshintsha ama-bond notes la ngedola leMelika kumbe ngeminye imihlobo yemali ukuze benelise ukuyafika khona. Imali le intshintshwa kuHomelink kanye lemabhanga. Emabhanga lapha uyakhulumisana labo ukuthi ufuna ukuya ngaphandle kwelizwe bazakupha imali elingene indleko zohambo lwakho,” kuphetha uMnu Shirichena.
