uMthunywa
Nkosilathi Sibanda
ABADLALI bebhola likanobhutshuzwayo abasakhulayo abaselathando lomdlalo kodwa bagijimisa ukuthola imali enengi ngesikhathi esifitshane, kutsho uRonald “Gidiza” Sibanda.
UGidiza ukhuthaze abasakhulayo ukuthi loba imali iyinsika yempilakahle akumelanga abadlali bazikhohlise ngoba okuqakathekileyo yikuzigcina emdlalweni lokukhuphukisa izinga lethalenta.
Ingcitshi le ikubeke sobala ukuthi ngesikhathi esadlala, abadlali babeqakathekisa umdlalo hatshi imali.
“Okumqoka yikuthi umdlali abelothando lomdlalo hatshi imali. Ukuphakamisa ithalenta lakho kuqakathekile,” kutsho uGidiza Ekhuluma kumbuthano wabaqeqetshi obuqoqwe yinhlanganiso yeZimbabwe Soccer Coaches Association (Zisca).
Umbuthano lo wenzelwe ebulenjini njalo ungaphansi kohlelo lweZisca oluhlanganisa abaqeqetshi labadlali abadla ubhedu.
Kuloluhlelo, abadlali bakudala bahlafuna udaba lokuguquka komdlalo wenguqu, beqathanisa okwakusenziwa ngesikhathi sabo lokwenzakala khathesi.
Omunye umdlali oseke waphatheka kuhlelo nguEsrom Nyandoro owadlalela i-AmaZulu kuleli leMamelodi Sundowns eMzansi.
UNyandoro wazise ukuba nxa abaqeqetshi befuna ukuthuthukisa abadlali, kumele bafunde ukuthapha ulwazi kumaqembu aseMzansi.
