uMthunywa
ABAZALI sebeziphe umlandu wokutshengisa ababalisi kanye lenhlanganiso ezibamelayo ukuba bayayiqakathekisa imfundo yabantwababo.
Ababalisi bathe bengena esikolo ekuseni babingelelwa ngabazali kanye lamabhokisi amathathu ezidumbu.
“Kabangcono ngitsho kulezipoko kungakho sizabangcwaba bephila,” kutsho omunye umzali.
Amabhokisi la kubikwa ebethethwe kwenye inkampani yezidumbu afakwa esikolo seMatshitsholo High School eLundi KwaZulu Natal.
Abazali laba bathi bafuna ababalisi baxotshwe.
Kubikwa ababalisi laba kulokuthi bafundise abantwana bona batshona beziphumulela njalo bezenzela eminye imisebenzi yabo.
“Lifaka impilo zabantwabethu engozini,” kutsho umzali.
Omunye umzali uMthembeni Sokhela (47) ubikele iphephandaba leDaily Sun ukuthi kulokulwa phakathi kwababalisi abasekela iNational Teachers Union (Natu) kanye lalabo asebengamalunga e-South African Democratic Teachers Union (Sadtu).
“Ngafika esikolo kwelinye ilanga ngafica omunye umbalisi olilunga leSadtu ezihlalele ngaphansi kwesihlahla.
Umphathisikolo emtshela ukuthi ayefundisa abantwana wathi kahambe yena,” kutsho uSokhela.
Abazali bakholwa ukuthi lokhu yikho okwenza abafundi abanengi bangaphumeleli. Kumnyaka ka2014 lo 2015 kwapasa abafundi abane nje kuphela.
“Abantwabethu bazaphumelela njani ababalisi betshona bezihlalele kodwa ekupheleni kwenyanga zonke behola?” kubuza uSokhela.
Omunye umfundi ofunda uGrade 11 uveze ukuthukuthela kwakhe laye.
“Ababalisi bethu kabalandaba lekusasa lethu ngitsho. Izikhathi ezinengi zitshona sihlezi singafundi ngoba ababalisi bengafuni ukuzosifundisa,” kutsho umfundi lo.
UMgcinisihlalo weSchool Governing Body (SGB) uZweni Mbatha uthe isimo sibi njalo abazali bathembisa ukungcwaba ababalisi bephila nxa abogatsha lwezemfundo bengekela ukuthatha amanyathelo.
Isikhulumi sezemfundo eKZN uSihle Mlotshwa uthe indaba le isifikile ehofisini yabo.
“Bekumele kube lomhlangano esikolo lesi kodwa kusuke kwaba lezinye imbambeko. Kodwa kulequla elithunywe ukuyakhuluma labazali. Siyathembisa ukuthi sizaphuma lesinqumo esifaneleyo,” kutsho uMlotshwa.
Umsekeli kaMkhokheli weNatu uAllen Thompson walile ukuthi ukulwa okukhona kubangelwa yikwehlukana kwenhlanganiso.
“Indaba le iqale ngomnyaka ka2014 ababalisi baze bahambise umbiko wokuthi umphathisikolo uyehluleka ukukhokhela. Kusukela lapho kunengi okwenzakalayo.
UThompson ucele izakhamizi ukuthi zekele ukwethusela ababalisi ngamabhokisi. — Ubulembu
