uMthunywa
YiNtatheli kaMthunywa
UMFANA owayeku Fomu 3 kwesinye isikolo esingaphansi kwendawo yenduna uChiya Chireya eGokwe owafa ngemva kokuzibophela kulandela ukubamba unkazana okuFomu 1 ibele, sebeveze ukuthi bafuna ukuhlawulwa ngenkomo ezingu-40.
Udaba lolu luthethwa enkundleni yenduna uChireya njalo abazali bomfana owafayo sebefuna ukuhlawulwa inkomo ezingu-40 ngabazali bentombazana eyabanjwa amabele bethi yibo ababangela ukufa kwendodana yabo kulandela ukuyethusela.
Kubikwa mhla wesehlakalo lesi umfana lo osengumuyi njalo owayehlala labazali bakhe wayevela esikolo ehamba lentombazana eku Fomu 1 waqala ukubambabamba amabele entombazana le eyahle yaqala ukukhala ngoba ingakuthandi okwakusenziwa ngumfana lo.
Kubikwa umfana lo wenza lokhu besendleleni bevela esikolo abafunda kiso.
“Unkazana lo kubikwa wasuka lapho wagijima eqonde ngakibo ekhala, wafika wabikela abazali bakhe ngokwakumehlele.
Abazali ngokuthukuthela balubhekisa ngakibo komfana bafika bethusela umfana,” itsho njalo induna uChireya.
Unina wentombi le wafika watshela umfana lo ukuthi uzabotshwa agwetshwelwe ukubamba iganyavu nxa engafuni ukuya ejele kumele ahlawule imali engange US$3 000.
“Ngenxa yokwesaba umfana lo wacina esezibophele.
Abazali bakamuyi uDorcas Chiungwa loCaston balanda abazali bentombazana bafika bathi bafuna ukuhlawulwa andubana bayebikela induna ngalokhu,” kutsho induna uChireya.
Induna iqhubekele phambili yabika ukuthi abazali bakamuyi babika ukuthi bafuna ukuhlawulwa ngenkomo ezingu-40 inkundla yakwala lokhu yathi bangahlawulwa ngenkomo ezintathu asebaziphiwayo.
Induna ikhuthaze abantwana abasakhulayo ukuthi bame ukungena kundaba zokuthandana besasesikolo.
